ଭୁବନେଶ୍ୱର ୬/୧୨ : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନେଇ ଏବେ କେବଳ ଓଡ଼ିଶାରେ ନୁହେଁ ଜାତୀୟ ସ୍ତରରେ ମଧ୍ୟ ଚର୍ଚ୍ଚା ବଢ଼ିବାରେ ଲାଗିଛି । ନିକଟରେ ଏକ ବର୍ଣ୍ଣାଢ଼୍ୟ ପରିବେଶରେ ଓଡ଼ିଶାରେ ହକି ବିଶ୍ୱକପ୍ ଆୟୋଜନ କରି ନବୀନ ଜାତୀୟ ଓ ଅନ୍ତର୍ଜାତୀୟ ସ୍ତରରେ ନିଜ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ଏବେ ବିଧାନସଭା ଓ ସଂସଦରେ ମହିଳାଙ୍କ ପାଇଁ ସ୍ଥାନ ସଂରକ୍ଷଣ ପ୍ରସଙ୍ଗକୁ ଜୋରଦାର କରି ଜାତୀୟ ସ୍ତରରେ ଏହାକୁ କାର୍ଯ୍ୟକାରୀ କରିବାକୁ ଯେଭଳି ପ୍ରଭାବଶାଳୀ ପଦକ୍ଷେପ ନେଇଛନ୍ତି, ସେଥିରେ ଜାତୀୟ ସ୍ତରରେ ତାଙ୍କର ଖ୍ୟାତି ଓ ଭାବମୂର୍ତ୍ତି ଯଥେଷ୍ଟ ବଢ଼ିବାରେ ଲାଗିଛି । ଏହି ପରିପ୍ରେକ୍ଷୀରେ ତାଙ୍କର ଭବିଷ୍ୟତ କାର୍ଯ୍ୟପନ୍ଥା ନେଇ ରାଜ୍ୟନୀତିକ ମହଲରେ ଚର୍ଚ୍ଚା ଜୋର୍ ଧରିଛି । ନବୀନ ଏବେ କ’ଣ ଜାତୀୟ ରାଜନୀତିରେ ପାଦ ଥାପିବାକୁ ଯାଉଛନ୍ତି କି ବୋଲି ବିଭିନ୍ନ ମହଲରେ ଆଲୋଚନା ଆରମ୍ଭ ହୋଇଛି ।
ବିଧାନସଭା ଓ ସଂସଦରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ ଲାଗି ନବୀନ ଗତ ମାସରେ ରାଜ୍ୟ ବିଧାନସଭାରେ ଏକ ସଂକଳ୍ପ ପାରିତ କରାଇଥିଲେ । ପରେ ଏ ଦିଗରେ ବଳିଷ୍ଠ ପଦକ୍ଷେପ ନେବାପାଇଁ ଅନୁରୋଧ କରି ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପତ୍ର ଲେଖିଥିଲେ । ଏହି ପଦକ୍ଷେପକୁ ଆଗେଇ ନେବା ସକାଶେ ଦେଶର ୭ଟି ଜାତୀୟ ଓ ୧୫ଟି ଆଞ୍ଚଳିକ ଦଳ ସହ ଯୋଗାଯୋଗ କରିବାକୁ ସେ ଅଣ୍ଟା ଭିଡ଼ିଛନ୍ତି । ଗତ ବୁଧବାର ବିଜେଡ଼ିର ଏକ ଗୁରୁତ୍ୱପୂର୍ଣ୍ଣ ବୈଠକରେ ଦଳର କର୍ମକର୍ତ୍ତାମାନଙ୍କ ସହ ଆଲୋଚନା କରି କିଏ କେଉଁଠି ଯାଇ କେଉଁ ଦଳର ନେତାଙ୍କୁ ଭେଟିବ ତାହାର ଏକ ତାଲିକା ପ୍ରସ୍ତୁତ କରିଛନ୍ତି । ବାସ୍ତବରେ ସେ ଏଭଳି ପଦକ୍ଷେପ ନେଇ ମହିଳାଙ୍କ ପାଇଁ ବ୍ୟବସ୍ଥାପକ ସଭାରେ ସ୍ଥାନ ସଂରକ୍ଷଣ ନେଇ ଜାତୀୟ ସ୍ତରରେ ଏକ ବଡ଼ ବିତର୍କ ଆରମ୍ଭ କରିଦେଇଛନ୍ତି ।
ନବୀନଙ୍କ ଏଭଳି ପଦକ୍ଷେପ ଯୋଗୁଁ ସମ୍ଭବତଃ ପ୍ରଥମ ଥରପାଇଁ ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଜାତୀୟ ରାଜନୀତିରେ ଓଡ଼ିଶା ନେତୃତ୍ୱ ନେବାଭଳି ସ୍ଥିତିକୁ ଆସିଯାଇଛି । ବିଶ୍ୱକପ୍ ହକି ଆୟୋଜନ ସାଙ୍ଗକୁ ମହିଳାମାନଙ୍କ ପାଇଁ ସ୍ଥାନ ସଂରକ୍ଷଣ ଲାଗି ନବୀନ ପଟ୍ଟନାୟକ ଆରମ୍ଭ କରିଥିବା ଅଭିଯାନ ଜାତୀୟ ସ୍ତରରେ ତାଙ୍କୁ ଜଣେ ତୁଙ୍ଗ ନେତାର ମାନ୍ୟତା ଦେବା ଆଶା କରାଯାଉଛି ।
ଅତୀତରେ ନବୀନଙ୍କ ପିତା ପ୍ରବାଦ ପୁରୁଷ ବିଜୁ ପଟ୍ଟନାୟକ ଗ୍ରାମ ପଞ୍ଚାୟତ ସ୍ତରରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ କରି ଜାତୀୟ ସ୍ତରରେ ଅନ୍ୟ ରାଜ୍ୟଗୁଡ଼ିକ ପାଇଁ ଉଦାହରଣ ସୃଷ୍ଟି କରିଥିଲେ । ପ୍ରକୃତରେ ନବୀନ ଯଦି ଏହି ପ୍ରସଙ୍ଗକୁ ସଫଳତାର ସହ ପରିଚାଳନା କରିପାରିବେ ତେବେ ଜାତୀୟ ରାଜନୀତିରେ ତାଙ୍କ ଭାବମୂର୍ତ୍ତୀ ଯଥେଷ୍ଟ ବୃଦ୍ଧି ପାଇବା ସହ ଆଗାମୀ ନିର୍ବାଚନରେ ବିଜେଡ଼ି ନିଶ୍ଚିତ ତାହାର ସୁଫଳ ଲାଭ କରିପାରିବ ।