ଭୁବନେଶ୍ୱର :  ପାରାଦୀପର ଏରସମା ଅଞ୍ଚଳରେ JSW Steel ର ମେଗା ଇଣ୍ଟିଗ୍ରେଟେଡ୍ ଷ୍ଟିଲ୍ ପ୍ଲାଣ୍ଟର ବ୍ଲାଷ୍ଟଫର୍‌ନେସ୍ ନିର୍ମାଣ କାର୍ଯ୍ୟ ଆଜି ଆନୁଷ୍ଠାନିକ ଭାବେ ଆରମ୍ଭ ହୋଇଯାଇଛି।ଏହି ଅବସରରେ ପାରାଦୀପର ଢ଼ିଙ୍କିଆ ଅଂଚଳରେ ଆୟୋଜିତ ସମାରୋହରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗଦେଇ ନିର୍ମାଣ କାର୍ଯ୍ୟର ଶିଳାନ୍ୟାସ କରିବା ସହିତ ଓଡ଼ିଶାକୁ ଦେଶର ‘ଷ୍ଟିଲ୍ ରାଜଧାନୀ’ ଭାବେ ଗଢ଼ିତୋଳିବାକୁ ରାଜ୍ୟ ସରକାରଙ୍କ ଦୃଢ଼ ସଂକଳ୍ପ ପ୍ରକାଶ କରିଛନ୍ତି।

ସୂଚନା ଯୋଗ୍ୟଯେ, ଏହି ପ୍ରକଳ୍ପରେ JSW Steel ପକ୍ଷରୁ ସମୁଦାୟ ୧ ଲକ୍ଷ ୨୫ ହଜାର କୋଟି ଟଙ୍କାର ପୁଞ୍ଜି ନିବେଶ କରାଯିବ, ଯାହା ଓଡ଼ିଶା ଇତିହାସରେ ସର୍ବବୃହତ୍। ଦୁଇଟି ପର୍ଯ୍ୟାୟରେ କାର୍ଯ୍ୟକାରୀ ହେବାକୁ ଥିବା ଏହି ଅତ୍ୟାଧୁନିକ ପ୍ଲାଣ୍ଟରୁ ବାର୍ଷିକ ପ୍ରାୟ ୨୪ ମିଲିଅନ୍ ଟନ୍ ଷ୍ଟିଲ୍ ଉତ୍ପାଦନ ହେବା ସହ ଏଠାରେ ୧୨ ମିଲିଅନ୍ ଟନର ଏକ ସିମେଣ୍ଟ ପ୍ଲାଣ୍ଟ, ୯୦୦ ମେଗାୱାଟର କାପ୍‌ଟିଭ୍ ପାୱାର ସିଷ୍ଟମ୍ ଏବଂ ଏକ ସ୍ୱତନ୍ତ୍ର ଜେଟି ମଧ୍ୟ ନିର୍ମାଣ କରାଯିବ।

JSW ଗ୍ରୁପ୍‌ର ଅଧ୍ୟକ୍ଷ ସଜ୍ଜନ ଜିନ୍ଦଲ ଏବଂ ଜାପାନର ସହଯୋଗୀ କମ୍ପାନୀ JFE Steel ର ବରିଷ୍ଠ କର୍ମକର୍ତ୍ତାଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ କମ୍ପାନୀକୁ ସମସ୍ତ ପ୍ରକାର ତୁରନ୍ତ ସରକାରୀ ସହାୟତା ଯୋଗାଇଦେବାକୁ ମଧ୍ଯ ମୁଖ୍ୟମନ୍ତ୍ରୀ ଶ୍ରୀ ମାଝୀ ଏହି ମଞ୍ଚରୁ ଆଶ୍ୱାସନା ଦେଇଛନ୍ତି।

ଅଭିଭାଷଣରେ ପୂର୍ବ ସରକାରଙ୍କୁ ସମାଲୋଚନା କରି ମୁଖ୍ୟମନ୍ତ୍ରୀ କହିଛନ୍ତି ଯେ, ଯେଉଁ ପ୍ରକଳ୍ପ ପାଇଁ ଜନସାଧାରଣ ଦୁଇ ଦଶନ୍ଧି ଧରି ଅପେକ୍ଷା କରିଥିଲେ ଏବଂ ଦୁଇ ବର୍ଷ ତଳେ ଯାହାର କେବଳ ତରତରିଆ ଶିଳାନ୍ୟାସ କରାଯାଇଥିଲା, ତାହାକୁ ନୂତନ ‘ଡବଲ ଇଞ୍ଜିନ’ ସରକାର ଆସିବା ପରେ ଫାଷ୍ଟ-ଟ୍ରାକ୍ ମୋଡ୍‌ରେ କାର୍ଯ୍ୟକାରୀ କରାଯାଇଛି।

ଓଡ଼ିଶାର ବୈଦେଶିକ ଶିଳ୍ପ ଭାଗିଦାରୀକୁ ନେଇ ମୁଖ୍ୟମନ୍ତ୍ରୀ ଜାପାନr JFE ଷ୍ଟିଲ୍ ସହଯୋଗରେ ଝାରସୁଗୁଡ଼ାରେ ଚାଲିଥିବା ୩୦ ହଜାର କୋଟି ଟଙ୍କାର ପ୍ରକଳ୍ପ ସମ୍ପର୍କରେ ସୂଚନା ଦେବା ସହ ସେ କହିଛନ୍ତି ଯେ, ଜାପାନ ସହ ଆଲୋଚନା ଅନୁଯାୟୀ ଖୁବ୍ ଶୀଘ୍ର ଓଡ଼ିଶା ଏବଂ ଜାପାନର ‘ତୋତ୍ତୋରି’ (Tottori) ରାଜ୍ୟ ମଧ୍ୟରେ ‘Sister States’ ବା ଭଗିନୀ ରାଜ୍ୟ ଚୁକ୍ତି ସ୍ୱାକ୍ଷରିତ ହେବ। ଏହାଦ୍ୱାରା ଓଡ଼ିଶାର ଶିଳ୍ପ, ପର୍ଯ୍ୟଟନ ଏବଂ ଶିକ୍ଷା କ୍ଷେତ୍ରରେ ଜାପାନ ବ୍ୟାପକ ପୁଞ୍ଜି ନିବେଶ କରିବ। କେବଳ ପାରାଦୀପ କିମ୍ବା ଝାରସୁଗୁଡ଼ା ନୁହେଁ, ବରଂ ଢେଙ୍କାନାଳ ଓ କେନ୍ଦୁଝରରେ ମଧ୍ୟ ଖୁବ୍ ଶୀଘ୍ର ନୂତନ ଷ୍ଟିଲ୍ ପ୍ଲାଣ୍ଟମାନ ଗଢ଼ିଉଠିବ ବୋଲି ଶ୍ରୀ ମାଝୀ ସୂଚନା ଦେଇଛନ୍ତି।

ରାଜ୍ୟରେ ଶିଳ୍ପାୟନ ଓ ନିଯୁକ୍ତିକୁ ନିଜ ସରକାରଙ୍କ ସବୁଠୁ ବଡ଼ ଫୋକସ୍ ବୋଲି ଦର୍ଶାଇ ମୁଖ୍ୟମନ୍ତ୍ରୀ ଦୁଇ ବର୍ଷର ସଫଳତା ରିପୋର୍ଟ ଉପସ୍ଥାପନ କରିଛନ୍ତି। ଏହି ସମୟ ମଧ୍ୟରେ ସରକାର ୪୩୩ଟି ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି, ଯାହା ଦ୍ୱାରା ୮ ଲକ୍ଷ ୫୦ ହଜାର କୋଟି ଟଙ୍କାର ନିବେଶ ସହ ୫ ଲକ୍ଷରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ। ବର୍ତ୍ତମାନ ସୁଦ୍ଧା ୧୪୮ଟି ପ୍ରକଳ୍ପର ଭୂମିପୂଜା ସରିଛି, ଯାହା ମାଧ୍ୟମରେ ପ୍ରାୟ ୨ ଲକ୍ଷ ୩୭ ହଜାର ଯୁବକଯୁବତୀ ନିଯୁକ୍ତି ପାଇଛନ୍ତି।

ପାରାଦୀପର ରୂପାନ୍ତରଣ ପାଇଁ ମୁଖ୍ୟମନ୍ତ୍ରୀ ଗୁଜରାଟର ମୁନ୍ଦ୍ରା ବନ୍ଦର ଶୈଳୀରେ ‘Two-Coast Strategy’ ବା ଦୁଇ ଉପକୂଳ ବିକାଶ ରଣନୀତି ଉପରେ ଗୁରୁତ୍ୱାରୋପ କରିଛନ୍ତି। ପ୍ରଧାନମନ୍ତ୍ରୀଙ୍କ ‘ପୂର୍ବୋଦୟ’ କଳ୍ପନାରେ ପାରାଦୀପ, ଧାମରା ଓ ଗୋପାଳପୁର ବନ୍ଦର ପ୍ରମୁଖ ଭୂମିକା ଗ୍ରହଣ କରିବେ, ଯେଉଁଥିରେ ପାରାଦୀପ ସବୁଠାରୁ ଶୀର୍ଷରେ ରହିବ।

ପାରାଦୀପରେ ଇଣ୍ଡିଆନ୍ ଅଏଲ୍ ରିଫାଇନାରୀ ଏବଂ ପେଟ୍ରୋ କେମିକାଲ୍ସ କମ୍ପ୍ଲେକ୍ସ ପରେ ଏବେ ଏକ କ୍ରୁଜ୍ ଟର୍ମିନାଲ୍ ଏବଂ ମେଗା ଜାହାଜ ନିର୍ମାଣ କମ୍ପ୍ଲେକ୍ସ ପ୍ରତିଷ୍ଠା ପାଇଁ ଯୋଜନା ରହିଛି। ଏହା ସହିତ କେନ୍ଦ୍ର ସରକାରଙ୍କ ପକ୍ଷରୁ ମିଳିଥିବା ୫ ହଜାର କୋଟି ଟଙ୍କା ଅନୁଦାନରେ ପାରାଦୀପ-କଟକ-ଭୁବନେଶ୍ୱର-ପୁରୀ ଅର୍ଥନୈତିକ କରିଡର (BCPPER) ନିର୍ମାଣ ହେବ, ଯେଉଁଥିରେ ପାରାଦୀପ ‘ମୁଖଶାଳା’ ସାଜିବ। ଆଗାମୀ କିଛି ବର୍ଷ ମଧ୍ୟରେ କେବଳ ପାରାଦୀପ ଅଞ୍ଚଳରେ ୧ ଲକ୍ଷରୁ ଅଧିକ ନୂତନ ନିଯୁକ୍ତି ସୃଷ୍ଟି ହେବ।

ଉକ୍ତ କାର୍ଯ୍ୟାରମ୍ଭ ଉତ୍ସବରେ ଯୋଗଦେଇ ଶିଳ୍ପ ମନ୍ତ୍ରୀ ଶ୍ରୀ ସମ୍ପଦ ଚନ୍ଦ୍ର ସ୍ୱାଇଁ କହିଛନ୍ତି ଯେ, ରାଜ୍ୟରେ ଶିଳ୍ପାୟନର ବାତାବରଣକୁ ଅଧିକ ସୁଦୃଢ଼ କରିବା ସହ ନିବେଶକମାନଙ୍କୁ ସମସ୍ତ ପ୍ରକାର ଆନୁଷଙ୍ଗିକ ସହାୟତା ଏବଂ ସୁରକ୍ଷା ଯୋଗାଇ ଦେବା ପାଇଁ ଶିଳ୍ପ ବିଭାଗ ଦିନରାତି କାର୍ଯ୍ୟ କରୁଛି । JSW Steel ପକ୍ଷରୁ କରାଯାଉଥିବା ୧ ଲକ୍ଷ ୨୫ ହଜାର କୋଟି ଟଙ୍କାର ଏହି ବିଶାଳ ପୁଞ୍ଜି ନିବେଶ ଓଡ଼ିଶାର ଅର୍ଥନୀତିକୁ ଏକ ନୂତନ ଗତି ପ୍ରଦାନ କରିବ ବୋଲି ମନ୍ତ୍ରୀ ଦୃଢ଼ ଆଶା ବ୍ୟକ୍ତ କରିଛନ୍ତି।

ଏହି ସମାରୋହରେ ଜଗତସିଂହପୁର ସାଂସଦ ଡକ୍ଟର ବିଭୁପ୍ରସାଦ ତରାଇ, ବାଲିକୁଦା-ଏରସମା ବିଧାୟକ ଶ୍ରୀ ସାରଦା ପ୍ରସନ୍ନ ଜେନା ଏବଂ ଜଗତସିଂହପୁର ବିଧାୟକ ଶ୍ରୀ ଅମରେନ୍ଦ୍ର ଦାସ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଏହା ସହିତ ରାଜ୍ୟ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ହେମନ୍ତ ଶର୍ମା, ଜଗତସିଂହପୁର ଜିଲ୍ଲାପାଳ ଶ୍ରୀ ଜେ. ସୋନାଲ, JSW ର ଅଧ୍ୟକ୍ଷ ଶ୍ରୀ ସଜ୍ଜନ ଜିନ୍ଦଲ, JSW ର ସିଇଓ (CEO) ଜୟନ୍ତ ଆଚାର୍ଯ୍ୟ ଏବଂ JSW ର ସଭାପତି (President) ଅନିଲ କୁମାର ସିଂହ ପ୍ରମୁଖ ଏହି ଅବସରରେ ଉପସ୍ଥିତ ଥିଲେ।

ଭୁବନେଶ୍ୱର : ସହରାଞ୍ଚଳ ଶାସନରେ ଦକ୍ଷତା, ସ୍ୱଚ୍ଛତା ଏବଂ ଉତ୍ତର ଦାୟିତ୍ଵ ବୃଦ୍ଧି କରିବା ଲକ୍ଷ୍ୟରେ ଏକ ବଡ଼ ଧରଣର ପ୍ରଶାସନିକ ଅଦଳବଦଳ କରାଯାଇଛି। ରାଜ୍ୟର ବିଭିନ୍ନ ସହରାଞ୍ଚଳ ସ୍ଥାନୀୟ ସଂସ୍ଥା (ULB)ରେ କାର୍ଯ୍ୟରତ ବିଭିନ୍ନ କ୍ୟାଡରର ୩୬୦ ଜଣ ଅଧିକାରୀଙ୍କୁ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବଦଳି ନିର୍ଦ୍ଦେଶ ଜାରି କରାଯାଇଛି। ନାଗରିକ-କେନ୍ଦ୍ରିକ ସହରାଞ୍ଚଳ ପ୍ରଶାସନକୁ ସୁଦୃଢ଼ କରିବା ପାଇଁ ସରକାରଙ୍କ ଚାଲିଥିବା ପ୍ରୟାସର ଏକ ଅଂଶସ୍ୱରୂପ, ମାନ୍ୟବର ଗୃହ ଓ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣଚନ୍ଦ୍ର ମହାପାତ୍ରଙ୍କ ମାର୍ଗଦର୍ଶନରେ ଏହି ବୃହତ ବଦଳି ପ୍ରକ୍ରିୟା କାର୍ଯ୍ୟକାରୀ ହୋଇଛି।

ଉତ୍ତମ ପ୍ରଶାସନିକ ସମନ୍ୱୟ, ଦ୍ରୁତ ସେବା ପ୍ରଦାନ ଏବଂ ସହରୀ ପରିଚାଳନାରେ ସୁଧାର ଆଣିବା ଉଦ୍ଦେଶ୍ୟରେ ମ୍ୟୁନିସିପାଲିଟି କର୍ପୋରେସନ୍ (ମହାନଗର ନିଗମ), ମ୍ୟୁନିସିପାଲିଟି (ପୌରପାଳିକା) ଏବଂ ବିଜ୍ଞାପିତ ଅଞ୍ଚଳ ପରିଷଦ (NAC) ଗୁଡ଼ିକରେ ନିୟୋଜିତ ଅଧିକାରୀମାନଙ୍କୁ ବଦଳି କରାଯାଇଛି। ଏହି ପଦକ୍ଷେପ ପ୍ରଶାସନିକ ନିଷ୍କ୍ରିୟତାକୁ ଦୂର କରିବା, ଉତ୍ତରଦାୟିତ୍ଵ ବୃଦ୍ଧି କରିବା ଏବଂ ଓଡ଼ିଶାର ପୌର ଶାସନ ବ୍ୟବସ୍ଥାରେ ଏକ ନୂତନ ଗତିଶୀଳତା ଆଣିବା ପାଇଁ ଉଦ୍ଦିଷ୍ଟ।

ଏହି ଅଦଳବଦଳ ପ୍ରକ୍ରିୟାରେ ନାଗରିକ ପ୍ରଶାସନ ଓ ସହରାଞ୍ଚଳ ସେବା ପ୍ରଦାନକୁ ଅଧିକ ମଜବୁତ କରିବା ପାଇଁ କାର୍ଯ୍ୟନିର୍ବାହୀ ଅଧିକାରୀ , ଡେପୁଟି କମିଶନର ଏବଂ ଆସିଷ୍ଟାଣ୍ଟ କମିଶନରଙ୍କ ସମେତ ୨୦ ଜଣ କ୍ଷେତ୍ରସ୍ତରୀୟ (field-level) ଅଧିକାରୀଙ୍କୁ ବଦଳି କରାଯାଇ ନୂତନ ନିଯୁକ୍ତି ଦିଆଯାଇଛି। କାର୍ଯ୍ୟାଳୟର କାର୍ଯ୍ୟଦକ୍ଷତା ଏବଂ ପରିଚାଳନାଗତ ଦକ୍ଷତାରେ ସୁଧାର ଆଣିବା ପାଇଁ ମନ୍ତ୍ରାଳୟ ଏବଂ ପ୍ରତିଷ୍ଠାନ ଶାଖାର (ministerial and establishment wings) ୨୬ ଜଣ ହେଡ୍ ଆସିଷ୍ଟାଣ୍ଟ, ୧୦୧ ଜଣ ସିନିୟର ଆସିଷ୍ଟାଣ୍ଟ ଏବଂ ୧୧୯ ଜଣ ଜୁନିୟର ଆସିଷ୍ଟାଣ୍ଟଙ୍କୁ ମଧ୍ୟ ବିଭିନ୍ନ ସହରାଞ୍ଚଳ ସ୍ଥାନୀୟ ନିକାୟକୁ ବଦଳି କରାଯାଇଛି।

ଏହା ବ୍ୟତୀତ ବିଭାଗ ପକ୍ଷରୁ ରାଜସ୍ୱ ପ୍ରଶାସନ ଶାଖାରେ ମଧ୍ୟ ଏକ ବଡ଼ ଧରଣର ପୁନର୍ଗଠନ କରାଯାଇ ବିଭିନ୍ନ ୟୁଏଲବିର ୯୪ ଜଣ ଟ୍ୟାକ୍ସ କଲେକ୍ଟର (କର ଆଦାୟକାରୀ)ଙ୍କୁ ବଦଳି କରାଯାଇଛି। ଏହି ପଦକ୍ଷେପ ଦ୍ୱାରା ରାଜସ୍ୱ ଆଦାୟ ପ୍ରକ୍ରିୟାରେ ଉନ୍ନତି ଆସିବ, ଆର୍ଥିକ ଶୃଙ୍ଖଳା ରହିବ ଏବଂ ସହରାଞ୍ଚଳ ସ୍ଥାନୀୟ ନିକାୟଗୁଡ଼ିକର ଆର୍ଥିକ ପରିଚାଳନା କ୍ଷମତା ସୁଦୃଢ଼ ହେବ ବୋଲି ଆଶା କରାଯାଉଛି।

ଏକ ସମାନ୍ତରାଳ ବିକାଶକ୍ରମେ, ବିଭାଗ ପକ୍ଷରୁ କାର୍ଯ୍ୟନିର୍ବାହୀ ଅଧିକାରୀ ଭାବେ କାର୍ଯ୍ୟରତ ୬ ଜଣ ଅଧିକାରୀଙ୍କୁ ସେମାନଙ୍କର ମୂଳ କ୍ୟାଡରକୁ ଫେରାଇ ଦିଆଯାଇଛି। ସେମାନଙ୍କ ମଧ୍ୟରେ ଓଡ଼ିଶା ପ୍ରଶାସନିକ ସେବାର ୨ ଜଣ ଏବଂ ଓଡ଼ିଶା ରାଜସ୍ୱ ସେବାର ୪ ଜଣ ଅଧିକାରୀ ସାମିଲ ଅଛନ୍ତି। ପ୍ରଚଳିତ ସରକାରୀ ନିୟମ ଏବଂ ପ୍ରଶାସନିକ ଆବଶ୍ୟକତା ଅନୁଯାୟୀ ଏହି ବଦଳି ଓ ପ୍ରତ୍ୟାବର୍ତ୍ତନ କରାଯାଇଛି ବୋଲି ସରକାରୀ ସୂତ୍ରରୁ ପ୍ରକାଶ।

ଭୁବନେଶ୍ୱର: ପ୍ରଚୁର କୋଇଲା ଖଣି ଥିବା ଓଡିଶାରେ ତାପଜ ବିଦ୍ୟୁତ କ୍ଷେତ୍ରରେ 30,000 କୋଟି ଟଙ୍କାର ପୁଞ୍ଜି ବିନିଯୋଗର ସମ୍ଭାବନା ରହିଛି। ତେବେ ରାଜ୍ୟ ସରକାରଙ୍କର ବିଦ୍ୟୁତ ପ୍ରକଳ୍ପ ନୀତି ଯୋଗୁଁ ପୁଞ୍ଜି ନିବେଶରେ ମାନ୍ଦାବସ୍ତା ଦେଖା ଦେଇଛି l ଏହି ପୁଞ୍ଜି ବର୍ତମାନ ପଡୋଶୀ ଛତିଶଗଡ ଓ ମଧ୍ୟ ପ୍ରଦେଶ ଆଡକୁ ମୁହାଁଉଛି।

ଓଡ଼ିଶା କୋଇଲା ବ୍ଲକ୍ ଲିଙ୍କେଜ୍ ଥିବା ପ୍ରକଳ୍ପ ପାଇଁ ୧୪%/୧୨% ଅଂଶଧନକୁ ବାଧ୍ୟତାମୂଳକ କରୁଥିବା ନିଜର ୨୦୦୮-୦୯ ନୀତିକୁ ଜାରି ରଖିଛି। ନିଜର ପ୍ରଚୁର କୋଇଲା ଗଚ୍ଛିତ ସତ୍ତ୍ୱେ ଏହି ଅପେକ୍ଷାକୃତ ଅଧିକ ହୋଷ୍ଟ ରାଜ୍ୟ ଅଂଶଧନକୁ ରାଜ୍ୟ ମଧ୍ୟକୁ ନୂତନ ପୁଞ୍ଜିନିବେଶ ପ୍ରବାହକୁ ସୀମିତ କରୁଥିବା ଏକ ପ୍ରମୁଖ କାରଣ ଭାବରେ ଦର୍ଶାଯାଇଛି।

ରାଜ୍ୟରେ ନୂତନ ପୁଞ୍ଜିନିବେଶକୁ ଆକର୍ଷିତ କରିବା ଏବଂ ବିଦ୍ୟୁତ କ୍ଷେତ୍ରକୁ ପ୍ରୋତ୍ସାହିତ କରିବା ପାଇଁ କେନ୍ଦ୍ରୀୟ ବିଦ୍ୟୁତ ପ୍ରାଧିକରଣ (ସିଇଏ) ଓ ବିଦ୍ୟୁତ ମନ୍ତ୍ରଣାଳୟ ମଧ୍ୟ ଓଡ଼ିଶାକୁ ପରିବର୍ତନଶୀଳ ମୂଲ୍ୟରେ ହୋଷ୍ଟ ରାଜ୍ୟର ଅଂଶଧନକୁ ହ୍ରାସ ବା ଉଚ୍ଛେଦ କରିବାକୁ ପରାମର୍ଶ ଦେଇଛନ୍ତି।

ନୂତନ ଭାବେ କାର୍ଯ୍ୟକ୍ଷମ ହୋଇଥିବା ତାପଜ ବିଦ୍ୟୁତ କେନ୍ଦ୍ରଗୁଡ଼ିକରୁ ପରିବର୍ତନଶୀଳ ଶୁଳ୍କରେ କ୍ଷମତାର ୫% ଯୋଗାଣକୁ ବାଧ୍ୟତାମୂଳକ କରିବା ଫଳରେ ହୋଷ୍ଟ (ଆୟୋଜକ) ରାଜ୍ୟ  ଛତିଶଗଡ଼ ଓ ମଧ୍ୟପ୍ରଦେଶ ଲାଭବାନ ହୋଇଛନ୍ତି।

ଆସୋସିଏସନ ଅଫ୍ ପାୱାର ପ୍ରୋଡ୍ୟୁସର୍ସର ମହାନିର୍ଦ୍ଦେଶକ  ଇନ୍ଦର କେଶରୀ କହିଛନ୍ତି ଯେ ଅନ୍ୟ ଏକ କୋଇଲା ସମୃଦ୍ଧ ରାଜ୍ୟ ଭାବେ ଛତିଶଗଡକୁ ପ୍ରାୟ ୮୦% ନୂଆ ତାପଜ ବିଦ୍ୟୁତ ପୁଞ୍ଜିନିବେଶ ପ୍ରବାହିତ ହୋଇଛି।

ଛତିଶଗଡ଼ର  ୧ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜିନିବେଶ ହାସଲ କରି ୧୬ ଗିଗାୱାଟରୁ ଅଧିକ କ୍ଷମତା ବୃଦ୍ଧି କରିଥିବା ବେଳେ ଓଡ଼ିଶା ୪ ଗିଗାୱାଟ୍‌ରୁ କମ୍ କ୍ଷମତା ପ୍ରତିଷ୍ଠା ହେବାର ଦେଖିଛି ଯାହା ୨୫,୦୦୦ କୋଟି ଟଙ୍କାରୁ କମ୍ ପୁଞ୍ଜିନିବେଶରେ ରୂପାନ୍ତରିତ ହୋଇଛି ବୋଲି ସେ କହିଛନ୍ତି।

“ଓଡ଼ିଶା ପାଖରେ ବିଦ୍ୟୁତ କ୍ଷେତ୍ରର ଅଭିବୃଦ୍ଧି ପାଇଁ ସମସ୍ତ ସହାୟକ କାରକ ଅଛି ଯଥା ପ୍ରଚୁର କଞ୍ଚାମାଲ, ବନ୍ଦରଗୁଡ଼ିକର ଉପଲବ୍ଧତା, ଏକ ବର୍ଦ୍ଧିଷ୍ଣୁ ଅର୍ଥନୀତି ଓ ଦକ୍ଷ ମାନବସମ୍ବଳର ସୁଯୋଗ।ତଥାପି, ପରିବର୍ତନଶୀଳ ମୂଲ୍ୟରେ ବିଦ୍ୟୁତର ଅଧିକ ବାଧ୍ୟତାମୂଳକ ହୋଷ୍ଟ ରାଜ୍ୟ ଅଂଶଧନ ବିକାଶକାରୀମାନଙ୍କୁ ନିରୁତ୍ସାହିତ କରିଛି।

ଏହି ପରିପ୍ରେକ୍ଷୀରେ ସେ କହିଛନ୍ତି ଯେ, ଜିନ୍ଦଲ ପାୱାର, ବେଦାନ୍ତ ଏବଂ ଆଦାନୀ ଭଳି କମ୍ପାନୀଗୁଡ଼ିକ ରାଜ୍ୟରେ ନୂତନ ସୁଯୋଗଗୁଡ଼ିକର ମୂଲ୍ୟାଙ୍କନ କରୁଛନ୍ତି। ପୂର୍ବ ନୀତିର ଆର୍ଥିକ ପ୍ରଭାବକୁ ବୁଝାଇ  କେଶରୀ ଉଲ୍ଲେଖ କରିଛନ୍ତି ଯେ ତାପଜ ବିଦ୍ୟୁତ ପ୍ରକଳ୍ପ ଖର୍ଚ୍ଚ ତୀବ୍ର ଭାବେ ବୃଦ୍ଧି ପାଇଛି । ପୂର୍ବରୁ ମେଗାୱାଟ୍ ପ୍ରତି ପ୍ରାୟ ୫ କୋଟି ଟଙ୍କାରୁ ଆଜି ପ୍ରାୟ ୧୨-୧୪ କୋଟି ଟଙ୍କାକୁ ବଢିଛି। ଫଳସ୍ୱରୂପ ସ୍ଥିର ଖର୍ଚ୍ଚ ପ୍ରତି ୟୁନିଟ୍ ପ୍ରାୟ ୧ ଟଙ୍କାରୁ ବୃଦ୍ଧି ପାଇ ପ୍ରାୟ ୪ ଟଙ୍କା ହୋଇଛି।

ପୂର୍ବ ବ୍ୟବସ୍ଥା ଅଧୀନରେ ରିହାତି ଯୋଗାଣ ଦାୟିତ୍ୱ ଅନ୍ୟ ଗ୍ରାହକମାନଙ୍କ ପାଇଁ ପ୍ରତି ୟୁନିଟ୍‌ରେ ପ୍ରାୟ ୧୪ ପଇସାର ସାମାନ୍ୟ ଶୁଳ୍କ ପ୍ରଭାବ ପକାଉଥିଲା। ତଥାପି, ସାମ୍ପ୍ରତିକ ପୁଞ୍ଜି ଖର୍ଚ୍ଚରେ, ଏହି ପ୍ରଭାବ ଉଲ୍ଲେଖନୀୟ ଭାବେ ପ୍ରତି ୟୁନିଟ୍ ପ୍ରାୟ ୫୫ ପଇସାକୁ ବୃଦ୍ଧି ପାଉଛି ଯାହା ପ୍ରକଳ୍ପର କର୍ଯ୍ୟକାରିତାକୁ ପ୍ରଭାବିତ କରୁଛି। ୫% ହୋଷ୍ଟ ରାଜ୍ୟ ଅଂଶଧନକୁ ଯିବା କାରଣରୁ ରାଜ୍ୟକୁ ହେବାକୁ ଥିବା ସମ୍ଭାବ୍ୟ ରାଜସ୍ୱ କ୍ଷତିକୁ ନେଇ ସୃଷ୍ଟି ହୋଇଥିବା ଚିନ୍ତାକୁ ସମ୍ବୋଧନ କରି  କେଶରୀ ଏଭଳି ଆଶଙ୍କାଗୁଡ଼ିକୁ ଭିତିହୀନ ବୋଲି ବର୍ଣ୍ଣନା କରିଛନ୍ତି।

” ଏକ ସାଧାରଣ ୧,୬୦୦ ମେଗାୱାଟ୍ ପ୍ରକଳ୍ପ ନିର୍ମାଣ ସମୟରେ ଏସଜିଏସଟି ବାବଦରେ ପ୍ରାୟ ୨,୦୦୦ କୋଟି ଟଙ୍କା ଏବଂ କାର୍ଯ୍ୟକ୍ଷମ ସମୟରେ ବାର୍ଷିକ ପ୍ରାୟ ୧୦୦ କୋଟି ଟଙ୍କା ସୃଷ୍ଟି କରିପାରିବ। ଏହା ସହିତ ଗୁରୁତ୍ୱପୂର୍ଣ୍ଣ ନିଯୁକ୍ତି ସୁଯୋଗ ମଧ୍ୟ ପ୍ରଦାନ କରିବ। ମୋଟ ଉପରେ ଅର୍ଥନୈତିକ ଓ ଆର୍ଥିକ ଲାଭଗୁଡ଼ିକ ୫% ଆବଣ୍ଟନ ବ୍ୟବସ୍ଥାକୁ ସ୍ଥାନାନ୍ତରକୁ ଦୃଢ଼ ଭାବରେ ସମର୍ଥନ କରୁଛି ବୋଲି ସେ କହିଛନ୍ତି।”

ବର୍ତ୍ତମାନ ଭାରତ ସରକାରଙ୍କ ଶକ୍ତି କୋଇଲା ଲିଙ୍କେଜ୍ ନୀତି ସହିତ ଲିଙ୍କେଜ୍ କିମ୍ବା ଆବଣ୍ଟନର ସୁପାରିଶ କରିବାରେ ରାଜ୍ୟ ସରକାରମାନଙ୍କର କୌଣସି ଭୂମିକା ନାହିଁ ଯାହା ପୂର୍ବ ନୀତିକୁ ଅଣ ଆକର୍ଷଣୀୟ କରିଦେଉଛି। ଓଡ଼ିଶା ସରକାର ବର୍ତମାନ ୫% ରାଜ୍ୟ ଅଂଶଧନ ବ୍ୟବସ୍ଥାକୁ ଯିବା ପାଇଁ ନିଷ୍ପତ୍ତି ନେଇଛନ୍ତି ଯାହାକୁ ବିଶେଷଜ୍ଞମାନେ ଏକ ପ୍ରଗତିଶୀଳ ପଦକ୍ଷେପ ବୋଲି କହିଛନ୍ତି, ଯାହା ରାଜ୍ୟ ମଧ୍ୟକୁ ପୁଞ୍ଜିନିବେଶ ପ୍ରବାହକୁ ବୃଦ୍ଧି କରିବ। ଗତ ଦଶନ୍ଧି ମଧ୍ୟରେ ପୁଞ୍ଜିନିବେଶର ଧାରା ଏହି ପାର୍ଥକ୍ୟକୁ ପ୍ରତିଫଳିତ କରୁଛି।