ଭୁବନେଶ୍ୱର ୧୬/୧୨ : ଡେଣା ଝାଡ଼ିଲେଣି ବିଜେଡ଼ି, ବିଜେପି ଓ କଂଗ୍ରେସ । ଉଡ଼ିବାର ପ୍ରୟାସ ଆରମ୍ଭ କଲେଣି । ଆଗାମୀ ୨୦୧୯ ନିର୍ବାଚନ ପାଇଁ ହେଲେଣି ପ୍ରସ୍ତୁତ । ନିକଟରେ ୫ଟି ରାଜ୍ୟରେ ଅନୁଷ୍ଠିତ ବିଧାନସଭା ନିର୍ବାଚନ ଫଳାଫଳ ପ୍ରକାଶ ପାଇବା ପରେ ଓଡ଼ିଶାରେ ଏହାର ଆଶୁ ପ୍ରଭାବ ଅନୁଭୂତ ହୋଇଛି । ସବୁ ରାଜନୈତିକ ଦଳ ଚଳଚଂଚଳ ହୋଇପଡ଼ିଛନ୍ତି । ଆଉ କିଛି ମାସ ପରେ ରାଜ୍ୟ ବିଧାନସଭା ଓ ଲୋକସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ଭୋଟରମାନଙ୍କୁ ନିଜ ଆଡ଼କୁ ଆକୃଷ୍ଟ କରିବା ପାଇଁ ସବୁ ଦଳ ସତେ ଯେପରି ହଠାତ ସକ୍ରିୟ ହୋଇପଡ଼ିଥିବା ପ୍ରତୀୟମାନ ହେଉଛି ।
ଆସନ୍ତା ୨୪ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓଡ଼ିଶା ଗସ୍ତରେ ଆସୁଛନ୍ତି । ସେ ଖୋର୍ଦ୍ଧା ବରୁଣେଇ ପାହାଡ ତଳେ ଏକ ବିଶାଳ ଦଳୀୟ ସମାବେଶ କରିବା ସହ ଅନ୍ୟକେତେକ ବିକାଶ ଯୋଜନାର ଶିଳାନ୍ୟାସ ଓ ଲୋକାର୍ପଣ କରିବେ । ସେହିଭଳି ଫେବୃଆରୀ ୨ ତାରିଖରୁ ଭୁବନେଶ୍ୱରଠାରେ ବିଜେପି ଆଦିବାସୀ ମୋର୍ଚ୍ଚା ଦୁଇଦିନିଆ ମହାସମାବେଶ କରିବ ।
ତେଣେ ଆସନ୍ତା ୨୬ ତାରିଖରେ ବିଜେଡ଼ି ନିଜର ପ୍ରତିଷ୍ଠା ଦିବସ ପାଳନ ପାଇଁ ଜୋରସୋର ଲାଗି ପଡ଼ିଛି । ଏହି ଦିବସରେ ଦଳ ପକ୍ଷରୁ ପଂଚାୟତ ସ୍ତରରୁ ଆରମ୍ଭ କରି ରାଜ୍ୟସ୍ତର ପର୍ଯ୍ୟନ୍ତ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଛି । ଏଥିରେ ସରକାରଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟ ସମ୍ପର୍କରେ ଲୋକମାନଙ୍କୁ ଅବଗତ କରାଯିବ । ଅପରପକ୍ଷରେ କଂଗ୍ରେସ ୨୬ ତାରିଖରେ ବିଭିନ୍ନ ପଂଚାୟତରେ କଳାପତାକା ଉଡାଇ କଳା ଦିବସ ପାଳନ କରିବାକୁ ଯାଉଛି । ବିଶେଷ କରି ଆମ ଗାଁ ଆମ ବିକାଶ ଓ ପିଠା କାର୍ଯ୍ୟକ୍ରମ ଏକ ପ୍ରହସନ ବୋଲି ଅଭିଯୋଗ କରି କଂଗ୍ରେସ ଏହି କାର୍ଯ୍ୟକ୍ରମ ହାତକୁ ନେଇଛି ।
ଏହାର ଅବ୍ୟବହିତ ପୂର୍ବରୁ ବିଜେଡ଼ି ପକ୍ଷରୁ ସୁରତରେ ଆସନ୍ତା କାଲି ଓଡ଼ିଶା ମହୋତ୍ସବର ଆୟୋଜନ କରାଯାଇଛି । ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ସମାବେଶରେ ଉଦ୍ବୋଧନ ଦେବେ । ଆସନ୍ତାକାଲି ମଧ୍ୟ ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାନୀ ଓଡ଼ିଶା ଗସ୍ତରେ ଆସୁଛନ୍ତି । ସେ ଭୁବନେଶ୍ୱରସ୍ଥିତ ବିଜେପି କାର୍ଯ୍ୟାଳୟରେ ରାଫେଲ ଯୁଦ୍ଧବିମାନ କାରବାର ସମ୍ପର୍କରେ ଏକ ସାମ୍ବାଦିକ ସମ୍ମିଳନୀରେ ସ୍ପଷ୍ଟୀକରଣ ଦେବେ ।
