ନୂଆଦିଲ୍ଳୀ ୧୨/୧୨ : ଚଳିତ ବିଧାନସଭା ବିଧାନସଭାରେ ମଧ୍ୟପ୍ରଦେଶରେ ବିଜେପି ଜିତିବାର ଯାହା ସାମାନ୍ୟ ଆଶା ଥିଲା ତାହା ମଧ୍ୟ ଶେଷରେ ମଉଳି ଯାଇଛି ।୨୩୦ ଆସ ବିଶିଷ୍ଟ ମଧ୍ୟପ୍ରଦେଶ ବିଧାନସଭାରେ କଂଗ୍ରେସ ୧୧୪ଟି ଆସନ ଲାଭ କରି ଏକକ ସଂଖ୍ୟା ଗରିଷ୍ଠ ଦଳର ମାନ୍ୟତା ହାସଲ କରିଛି । ଇତିମଧ୍ୟରେ କଂଗ୍ରେସକୁ ବିଏସ୍ପି ସମର୍ଥନ ଘୋଷଣା କରିସାରିଥିବାରୁ କଂଗ୍ରେସ ତାହା ସହାୟତାରେ ସରକାର ଗଢ଼ିବା ନିଶ୍ଚିତ ହୋଇଯାଇଛି । ମ୍ୟାଜିକ ନମ୍ବର ୧୧୬ ହୋଇଥିବାବେଳେ ବିଏସ୍ପି ଦୁଇଟି ଆସନ ଲାଭ କରିଥିବାରୁ ତାହା ସମର୍ଥନରେ କଂଗ୍ରେସ ସଂଖ୍ୟା ଗରିଷ୍ଠତା ହାସଲ କରିଛି । ୧୦୯ଟି ଆସନରେ ବିଜେପିକୁ ସନ୍ତୁଷ୍ଟ ହେବାକୁ ପଡ଼ିଛି । ଆଉ ୭ଟି ଆସନ ଲାଭ କରିଥିଲେ ବିଜେପି ସରକାର ଗଠନ କରିବାକୁ ସକ୍ଷମ ହୋଇଥାନ୍ତା ।
ରାଜସ୍ଥାନ ଓ ଛତିଶଗଡ଼ରେ କଂଗ୍ରେସ ମଧ୍ୟ ସରକାର ଗଠନ କରିବାକୁ ଯାଉଛି । ରାଜସ୍ଥାନର ୧୯୯ଟି ଆସନ ପାଇଁ ନିର୍ବାଚନ ଅନୁଷ୍ଠିତ ହୋଇଥିବାବେଳେ କଂଗ୍ରେସ ୧୦୦ଟି ଆସନ ଲାଭ କରିଛି । ସେଠାରେ ବିଏସ୍ପିର ଆସନ ସଂଖ୍ୟା ୬ । ସେଠାରେ ମଧ୍ୟ କଂଗ୍ରେସ ବିଏସ୍ପି ସହାୟତାରେ ସରକାର ଗଢ଼ିବାକୁ ଯାଉଛି । ଏହି ରାଜ୍ୟରେ ବିଜେପିର ଆସନ ସଂଖ୍ୟା ୭୩ । ତେବେ ରାଜ୍ୟରେ ସଚିନ ପାଇଲଟ୍ ଓ ଅଶୋକ ଗେହେଲଟଙ୍କ ମଧ୍ୟରୁ କିଏ ମୁଖ୍ୟମନ୍ତ୍ରୀ ହେବେ ସେ ନିଷ୍ପତ୍ତି କଂଗ୍ରେସ ସଭାପତି ରାହୁଲ ଗାନ୍ଧୀଙ୍କ ଉପରେ ଛାଡ଼ି ଦିଆଯାଇଛି । ଆଜି ଅପରାହ୍ନରେ ଅନୁଷ୍ଠିତ ବିଧାୟକ ଦଳ ବୈଠକରେ ଏ ସମ୍ପର୍କରେ ସର୍ବସମ୍ମତ ନିଷ୍ପତ୍ତି ନିଆଯାଇଛି ।
ମଧ୍ୟପ୍ରଦେଶରେ ମୁଖ୍ୟମନ୍ତ୍ରୀ ଦଉଡରେ ଜ୍ୟୋତିରାଦିତ୍ୟ ସିନ୍ଧିଆ ଓ କମଳନାଥ ରହିଥିଲେ ମଧ୍ୟ କମଳନାଥଙ୍କ ଉପରେ ରାହୁଳ ଗାନ୍ଧୀ ହାତ ଥୋଇପାରନ୍ତି ବୋଲି ପରୋକ୍ଷ ଭାବେ ସୂଚନା ମିଳିଛି । ତେବେ କିଏ ମୁଖ୍ୟମନ୍ତ୍ରୀ ହେବେ ତାହା ଖୁବ୍ଶୀଘ୍ର ଜଣାପଡ଼ିଯିବ । ଆଜି ସକାଳେ ଶ୍ରୀ ସିନ୍ଧିଆ, କମଳନାଥ ଓ ଦିଗ୍ବିଜୟ ସିଂ ଏକତ୍ର ରାଜଭବନ ଯାଇ ରାଜ୍ୟପାଳ ଆନନ୍ଦୀବେନ୍ ପଟେଲଙ୍କୁ ଭେଟି ସରକାର ଗଠନ ପାଇଁ ଦାବି ଉପସ୍ଥାପନ କରିଛନ୍ତି । ଛତିଶଗଡ଼ରେ ବିଜେପିକୁ ଶୋଚନୀୟ ଭାବେ ପରାସ୍ତ କରି କଂଗ୍ରେସ କ୍ଷମତା ହାସଲ କରିଛି । ଏଠାରେ କଂଗ୍ରେସ ୬୮ ଆସନ ଲାଭ କରିଥିବାବେଳେ ବିଜେପି ମାତ୍ର ୧୫ଟି ଆସନରେ ବିଜୟୀ ହୋଇଛି ।
