ପାଟନା: ବିହାରରେ ଏନ୍ଡିଏର ସହଯୋଗୀ ଦଳମଧ୍ୟରେ ଲୋକସଭା ଆସନ ବୁଝାମଣାର ଫର୍ମୁଲାରେ ବିଜେପି କ୍ଷତିଗ୍ରସ୍ତ ହୋଇଛି । ଆସନ ବୁଝାମଣାକୁ ନେଇ ଦଳରେ ଅସନ୍ତୋଷ କୁହୁଳିବାରେ ଲାଗିଛି ।
ଆସନ୍ତା ୨୦୧୯ ଲୋକସଭା ନିର୍ବାଚନ ପାଇଁ ଯେଉଁ ଆସନ ବୁଝାମଣାର ଫର୍ମୁଲା ଚୂଡାନ୍ତ ହୋଇଛି ସେଥିରେ ବିଜେପିକୁ ୧୭ଟି, ନିତିଶ କୁମାରଙ୍କ ଜନତା ଦଳ(ୟୁ)କୁ ୧୭ଟି ଓ ରାମବିଳାସ ପାଶୱାନଙ୍କ ଏଲ୍ଜେପିକୁ ୬ଟି ଆସନ ମିଳିବ । ଏହି ଆସନ ବୁଝାମଣାରେ ବିଜେପି ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି । ଗତ ଲୋକସଭା ନିର୍ବାଚନରେ ବିଜେପିର ୨୨ ଜଣ ପ୍ରାର୍ଥୀ ବିଜୟୀ ହୋଇଥିଲେ । ବର୍ତମାନ ଫର୍ମୁଲାରେ ଦଳକୁ ୫ ଜଣ ସାଂସଦଙ୍କୁ ନିର୍ବାଚନ ଲଢ଼ିବାରୁ ବଂଚିତ କରିବାକୁ ପଡିବ । ଅନ୍ୟ ପକ୍ଷରେ ଜେଡିୟୁର ମାତ୍ର ୨ ଜଣ ନିର୍ବାଚିତ ହୋଇଥିଲେ । ଏହାକୁ ୧୫ଟି ଆସନର ଲାଭ ହୋଇଛି । ଏଲ୍ଜେପିର ଲାଭ ବା କ୍ଷତି ହୋଇ ନାହିଁ କାରଣ ଲୋକସଭାରେ ବର୍ତମାନ ଏହାର ଛଅ ଏମ୍ପି ଅଛନ୍ତି ।
ମୋଦି ବିରୋଧୀ ଅସନ୍ତୁଷ୍ଟ ନେତା ଶତ୍ରୁଘ୍ନ ସିନ୍ହା ଙ୍କୁ ଏଥର ଟିକେଟ୍ ମିଳି ନପାରେ । ଶତ୍ରୁଘ୍ନ ପାଟନା ସାହେବ ନିର୍ବାଚନ ମଣ୍ଡଳୀରୁ ଲୋକସଭାକୁ ନିର୍ବାଚିତ ହୋଇଥିଲେ । ସେହି ଭଳି ବେଗୁସରାଇ ସାଂସଦ ଭୋଲା ସିଂହଙ୍କ ମୃତ୍ୟୁ ପରେ ଆସନଟି ଖାଲି ପଡିଛି । ମୋଦି-ଶାହାଙ୍କ ଏହି ଆସନ ବୁଝାମଣା ନିଷ୍ପତିରେ ଅନେକ ବିଜେପି ନେତା ଆଶଂକାରେ ରହିଛନ୍ତି । କେଉଁ ଆସନ ଜେଡିୟୁ ଯିବ ତାହା ନେଇ ଚର୍ଚ୍ଚା ଆରମ୍ଭ ହୋଇ ଯଇଛି । ତେବେ ଯେଉଁ ଯେଉଁ ଆସନରେ ସାଂସଦଙ୍କୁ ଟକେଟ ମିଳିବ ନାହିଁ ଏବଂ ଯେଉଁ ଆସନରେ ଗତ ନିର୍ବାଚନରେ ପରାଜୟ ପରେ ସକ୍ରିୟ ଥିବା ନେତାଙ୍କୁ ବ ଅନ୍ୟ ଆଶାୟୀଙ୍କୁ ଟିକେଟ୍ ମିଳିବ ନାହିଁ ସେମାନେ ବିଦ୍ରୋହ କରିବାର ସମ୍ଭାବନା ରହିଛି ।
“ମୋଦିଙ୍କୁ ବିମୁଦ୍ରୀକରଣ ସଂପର୍କରେ ପ୍ରଶ୍ନକରି ଜେଡିୟୁ ଓ ଏଲଜେପି ଲାଭବାନ ହୋଇଛନ୍ତି । ଏହି ଆସନ ବୁଝାମଣା ଫର୍ମୁଲାରୁ ବୁଝି ପାରୁଥିବେ ଏନ୍ଡିଏ କେଉଁ ଅବସ୍ଥାରେ ଆସି ପହଂଚିଲାଣି ।”, କହିଛନ୍ତି ଆଜେଡି ନେତା ତେଜେଶ୍ୱୀ ଯାଦବ ।
