ଭୁବନେଶ୍ୱର ୧୮/୧୨ : ମଧ୍ୟପ୍ରଦେଶ ଓ ଛତିଗଡ଼ର ନୂଆ କଂଗ୍ରେସ ସରକାର ଶପଥ ଗ୍ରହଣ କରୁକରୁ କୃଷକମାନଙ୍କ ଋଣ ଛାଡ଼ କରିଥିବା ବେଳେ ତାହାର ପ୍ରଭାବରେ ଓଡ଼ିଶା ରାଜନୀତି ସରଗରମ ହୋଇଉଠିଛି । ବିଜେପି ଓ କଂଗ୍ରେସ କୃଷି ଋଣ ଛାଡ଼ ପାଇଁ ବିଜେଡ଼ି ସରକାରଙ୍କ ଉପରେ ଚାପ ପକାଇଥିବା ବେଳେ ବିଜେଡ଼ି ମଧ୍ୟ ବିରୋଧୀଙ୍କ ଉପରେ ପ୍ରତି ଆକ୍ରମଣ କରିବାକୁ ପଛାଇ ନାହିଁ । କୃଷକଙ୍କ ସ୍ୱାର୍ଥ ହାସଲ ଦାବିରେ ବିଜେଡ଼ି ଆସନ୍ତା ମାସ ୮ ତାରିଖରେ ସଂସଦ ଘେରାଉ କରିବାକୁ ଯାଉଥିବାବେଳେ ବିଜେପି ମଧ୍ୟ ଏହି ପ୍ରସଙ୍ଗରେ ସେହିଦିନ ରାଜ୍ୟ ସଚିବାଳୟ ଘେରାଉ କରିବାକୁ ଯାଉଛି । କିଷାନ କଂଗ୍ରେସ ମଧ୍ୟ ଚାଷୀ ଆତ୍ମହତ୍ୟା ଓ କୃଷି ସମସ୍ୟା ନେଇ ରାଜ୍ୟର ବିଜେଡ଼ି ସରକାର ଓ କେନ୍ଦ୍ରର ବିଜେପି ସରକାରଙ୍କୁ ସମାନ ଭାବେ ଦାୟୀ କରି ୮ ତାରିଖରେ ଆନ୍ଦୋଳନ କରିବ ବୋଲି ଘୋଷଣା କରିଛି ।
ଏହି ପ୍ରସଙ୍ଗରେ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି ଯେ, କଂଗ୍ରେସ କ୍ଷମତାକୁ ଆସିଲେ ତୁରନ୍ତ କୃଷକମାନଙ୍କ ଋଣ ଛାଡ କରିବ । ଖାଲି ସେତିକି ନୁହେଁ , କୃଷକମାନଙ୍କ ବିକାଶ ପାଇଁ ୫ ବର୍ଷିଆ ସ୍କିମ୍ ମଧ୍ୟ କାର୍ଯ୍ୟକାରୀ କରାଯିବ ।
ତେଣେ ବିଜେପି ମଧ୍ୟ କ୍ଷମତାକୁ ଆସିଲେ କୃଷି ଋଣ ଛାଡ଼ କରିବ ବୋଲି ପ୍ରତିଶ୍ରୁତି ଦେଇଛି । ଦଳର ରାଜ୍ୟ ସଭାପତି ବସନ୍ତ ପଣ୍ଡା କହିଛନ୍ତି ଯେ, ବିଜେପି କୃଷି ଋଣକୁ ସମ୍ପୂର୍ଣ୍ଣ ସୁଧମୁକ୍ତ କରିବ । ଶ୍ରୀ ପଣ୍ଡା ମଧ୍ୟ ରାଜ୍ୟ ସରକାର କୃଷି ଋଣ ଛାଡ କରିବା ଏବଂ ଧାନର ସର୍ବନିମ୍ନ ମୂଲ୍ୟ ବୃଦ୍ଧି କରିବା ପାଇଁ ଦାବି କରିଛନ୍ତି । ରାଜ୍ୟରେ ମଣ୍ଡି ବ୍ୟବସ୍ଥା ବିପର୍ଯ୍ୟସ୍ତ ହୋଇଥିବା ଅଭିଯୋଗ କରି ଦଳ ଅବିଳମ୍ବେ ମଣ୍ଡି ଘେରାଉ ଅଭିଯାନ ଆରମ୍ଭ କରିବ ବୋଲି ଚେତାବନୀ ଦେଇଛନ୍ତି । ଶ୍ରୀ ପଣ୍ଡା କହିଛନ୍ତି ଯେ, କୃଷି ଋଣ ଛାଡ଼ ଦାବିରେ ଆସନ୍ତା ୮ ତାରିଖରେ ବିଜେପି ସଚିବାଳୟ ଘେରାଉ କରିବ ।
ଅପରପକ୍ଷରେ କୃଷିମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି ଯେ, ଯେଉଁମାନେ କୃଷି ଋଣ ଛାଡ଼ କଥା କହୁଛନ୍ତି ସେମାନେ ଆଗ କ୍ଷମତାକୁ ଆସନ୍ତୁ, ତା ପରେ ଦେଖାଯିବ । କୃଷି ଓ କୃଷକଙ୍କ ଉନ୍ନତି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯାହା କରିଛନ୍ତି ତାହା ଅନ୍ୟ କେହି କରିନାହାନ୍ତି ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି । ବିଜେପିର ମଣ୍ଡି ଘେରାଉ କାର୍ଯ୍ୟକ୍ରମକୁ ସମାଲୋଚନ କରି ବିଜେଡ଼ି ମୁଖପାତ୍ର ପ୍ରତାପ ଦେବ କହିଛନ୍ତି ଯେ, ବିଜେପିର ଏହି ପଦକ୍ଷେପ “ବିନାଶ କାଳେ ବିପରୀତ ବୁଦ୍ଧି” । କୃଷକମାନଙ୍କ ସ୍ୱାର୍ଥସାଧନ ଦାବିରେ ଆସନ୍ତା ୮ ତାରିଖରେ ବିଜେଡ଼ି ସଂସଦ ଘେରାଉ କରିବାକୁ ଯାଉଥିବା ବେଳେ ସେହିଦିନ ବିଜେପି ଓଡ଼ିଶାରେ ଆନ୍ଦୋଳନ ଡାକରା ଦେବା ସମ୍ପୂର୍ଣ୍ଣ ଅଯୋ÷କ୍ତିକ । ଏଥିରେ ବିଜେପିର ଅଭିଳାଷ କ’ଣ ତାହା ଜଳଜଳ ଦେଖାଯାଉଛି ।