କଳାହାଣ୍ଡି ୨୦/୨ : ଆଜି ଭବାନୀପାଟଣାରେ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଭାରତୀୟ ଜନତା ପାର୍ଟିର ବୁଥ ସ୍ତରୀୟ କର୍ମୀଙ୍କୁ ଉଦବୋଧନ ଦେଇଛନ୍ତି । ସେ ରାଜ୍ୟର ୫ଟି ସଂସଦୀୟ କ୍ଷେତ୍ରର କର୍ମୀଙ୍କୁ ଗୁରୁମନ୍ତ୍ର ପ୍ରଦାନ କରିଛନ୍ତି । ଏହାସହ ସେ ରାଜ୍ୟ ମୁଖମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବର୍ଷିଛନ୍ତି ।
ଉଦବୋଧନ ଦେବା ପୂର୍ବରୁ ଯୋଗୀ ପୁଲୱାମା ସହିଦଙ୍କୁ ମନେ ପକାଇଥିଲେ । ମଂଚରେ ସହିଦଙ୍କୁ ଶଦ୍ଧାଂଜଳି ଦିଆଯାଇଥିଲା । ଏହାପରେ ସେ କହିଥିଲେ କି ଏକ ହଜାର ବର୍ଷର ପରମ୍ପରା କିପରି ସଂରକ୍ଷିତ ରଖାଯିବ ଏହା କଳାହାଣ୍ଡିର ଏକ ଉଦାହରଣ । ଏଠାରେ ରାଜ ପରମ୍ପରା ସହ ଭାରତୟ ସ୍ୱାଧୀନତା ପାଇଁ ନିଜର ସର୍ବଶ୍ୱ ହରାଇଥିବା ସଂଗ୍ରାମୀଙ୍କ କାହାଣୀ ରହିଛି । ସେ ସଂଗ୍ରାମୀ ରେଡେ ମାଝୀ, ଧରମ ସିଂ ମାନ୍ଧାତା, ବିର ସୁରେନ୍ଦ୍ର ସାଏ, ହାତୀ ସିଂ, କୁଂଜେଲ ସିଂଙ୍କୁ ପ୍ରଣାମ ଜଣାଇଥିଲେ ।
ଏହାପରେ କର୍ମୀଙ୍କୁ ଉଦବୋଧନ ଦେଇ ସେ କହିଛନ୍ତି ଯେ, ମୋଦୀ ହିଁ ଆତଙ୍କବାଦୀଙ୍କୁ ଜବାବ ଦେଇପାରିବେ । ପୂର୍ବରୁ କାଶ୍ମୀରରେ ଆତଙ୍କବାଦୀଙ୍କ ଗୁଳି ପରେ ଗୁଳିଚାଳନା ହେଉଥିଲା କିନ୍ତୁ ବିଜେପି ସରକାର ଆସିବା ପରେ ସେନାର ହାତ ଖୋଲି ଦିଆଯାଇଛି । ଭାରତୀୟ ନାଗରିକଙ୍କ ସୁରକ୍ଷା ସହ ଖେଳିଲେ ଆତଙ୍କବାଦୀଙ୍କୁ ନିପାତ କରାଯିବ । ଆଜି ପାକିସ୍ତାନ ଏବଂ ପାକିସ୍ତାନ ସମର୍ଥିତ ଆତଙ୍କବାଦୀ ଏହାକୁ ନେଇ ଡରି ଯାଇଛନ୍ତି । ଏହା ଦେଶର ଲଢେଇ । ଦେଶର ଜନତା ଏଥିରେ ସାମିଲ ହେବା ଆବଶ୍ୟକ ।
୧୯ ବର୍ଷରେ ରାଜ୍ୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧୭ ଲକ୍ଷ ଘର କରିଛନ୍ତି ଏବଂ ଯୁପିରେ ୨ ବର୍ଷରେ ୨୦ ଲକ୍ଷ ଘର ଗରିବଙ୍କୁ ମିଳିଛି । ୨ କୋଟି ୬୦ ଲକ୍ଷ ଲୋକଙ୍କୁ ପାଇଖାନା ସୁବିଧା ଦିଆଯାଇଛି । ଧର୍ମେନ୍ଦ୍ର ମନ୍ତ୍ରୀ ହେବା ପରେ ୨୦୧୪ ରୁ ୨୦୧୮ ମଧ୍ୟରେ ୧୨କୋଟି ପରିବାରକୁ ଏଲପିଜି ମିଳିଛି । ସାଢେ ୬ କୋଟି କନେକ୍ସନ ନିଶୁଳ୍କ ପ୍ରଦାନ କରାଯାଇଛି । ବିଜେପି ଦେଶରେ ପରିବର୍ତନ ଆଣିଛି । ଏସସି ଏସଟି ପାଇଁ ଶତ ପ୍ରତିଶତ ମାଗଣା ରୋଷେଇ ଗ୍ୟାସ, ମାଗଣା ଘର, ମାଗଣା ପାଇଖାନା, ବିଦ୍ୟୁତ ସଂଯୋଗୀକରଣ ହୋଇଛି । ଟଙ୍କାକିଆ ଚାଉଳରୁ ୨୯ ଟଙ୍କା କେନ୍ଦ୍ର ଦେଉଥିବା ବେଳେ ଏକ ଟଙ୍କା ରାଜ୍ୟ ସରକାର ଦେଉଛନ୍ତି । ବିକାଶ ଯୋଜନାରେ ଭାରତ ଆଗେଇଛି । କେନ୍ଦ୍ର ସରକାର ଡିଜିଟାଲ ଇଣ୍ଡିଆରୁ ଆରମ୍ଭ କରି ଆୟୁଷ୍ମାନ ଭାରତରେ ୫୦ କୋଟି ଲୋକଙ୍କୁ ୫ ଲକ୍ଷର ସ୍ୱାସ୍ଥ୍ୟ ସୁବିଧା ପ୍ରଦାନ କରିଛନ୍ତି । କିଷାନ ସମ୍ମାନରେ କୃଷକଙ୍କୁ ବର୍ଷକୁ ୬ହଜାର ଟଙ୍କା ମିଳିବ । କୃଷକଙ୍କ ଜୀବନରେ ପରିବର୍ତନ ହେବ ।
ଆଗାମୀ ନିର୍ବାଚନ ପାଇଁ ବିଜେପିର କର୍ମୀଙ୍କୁ ଅଭିନନ୍ଦନ ଜଣାଇଛନ୍ତି ଯୋଗୀ । ମେଦୀଙ୍କ ନେତୃତ୍ୱରେ ଦେଶର ଭବିଷ୍ୟତ ସୁରକ୍ଷିତ । ଓଡିଶାବାସୀ ମଧ୍ୟ ସୁରକ୍ଷିତ ହେବ । ୨୦୧୯ରେ ବିଜୟ ପ୍ରାପ୍ତ କରିବା ପାଇଁ ଚେଷ୍ଟା କରାଯାଉ ବୋଲି ସେ କର୍ମୀଙ୍କୁ ଉଦବୋଧନ ଦେଇଛନ୍ତି ।