ଭୁବନେଶ୍ୱର : ରାଜ୍ୟ ଖଣି ଓ ଇସ୍ପାତ ମନ୍ତ୍ରୀ ବିଭୁତି ଭୂଷଣ ଜେନା ମଙ୍ଗଳବାର ବିଧାନସଭାରେ ତାଙ୍କ ବିଭାଗର ଖର୍ଚ୍ଚ ଦାବିର ଉତ୍ତର ରେ କହିଛନ୍ତି ଯେ ଚଳିତ 2024-25 ଆର୍ଥିକ ବର୍ଷରେ ମୋଟ 50,000 କୋଟି ଟଙ୍କା ଖଣି ରାଜସ୍ବ ଭାବେ ମିଳିବାର ଲକ୍ଷ୍ୟ ରଖା ଯାଇଛି l ଏଠାରେ ଉଲ୍ଲେଖ ଯେ ୨୦୨୩-୨୪ ଆର୍ଥିକ ବର୍ଷରେ ଖଣି ରାଜସ୍ୱ ବାବଦକୁ ୪୬୩୯୬. ୨୭ କୋଟି ଟଙ୍କା ଆଦାୟ ହୋଇଛି। ଚଳିତ ବର୍ଷ ୨୦୨୪-୨୫ ଆର୍ଥିକ ବର୍ଷରେ ୩୧ ଜୁଲାଇ, ୨୦୨୪ ସୁଦ୍ଧା ଅଦ୍ଯାବଦି ୧୬୬୮୩.୩୫ କୋଟି ଟଙ୍କା ଆଦାୟ ହୋଇଛି ଯାହାକି ପୂର୍ବ ବର୍ଷ ଏହି ସମୟ ଅପେକ୍ଷା ଶତକଡା ୧୬.୮୦ ପ୍ରତିଶତ ଅଧିକ ଅଟେ ।
ରାଜ୍ୟରେ ଅଧୁନା ଗୁରୁ ଖଣିଜ ପଦାର୍ଥ ର ଉତ୍ପାଦନ ନିମନ୍ତେ ୩୮୫ଗୋଟି ଖଣିଜ ବ୍ଲକ ମଧ୍ୟରୁ ୨୦୫ ଗୋଟି ଖଣି କାର୍ଯ୍ୟକ୍ଷମ ଅଛି ଓ ୧୮୦ ଗୋଟି ଖଣି ଅଣ-କାର୍ଯ୍ୟକ୍ଷମ ଅଛି। ୧୦୨ଗୋଟି ଖଣି ରୁ ଲୌହାପଥର, ମାଙ୍ଗାନିଜ , କ୍ରୋମାଇଟ, ବକ୍ସାଇଟ ଇତ୍ୟାଦି ଉତ୍ପାଦିତ ହେଉଥିବାବେଳେ ୩୩ଗୋଟି ଖଣିରୁ କୋଇଲା, ସାତଗୋଟି ଖଣିରୁ ରତ୍ନପଥର, ୫୬ଗୋଟି ଖଣିରୁ ସାଜସଜ୍ଜା ପଥର ବା Decorative Stone ଏବଂ ଅନ୍ୟ ସାତଗୋଟି ଖଣିରୁ ବିନିର୍ଦ୍ଦିଷ୍ଟ ଲଘୁ ଖଣିଜ ବା Specified Minor Mineral ଉତ୍ପାଦିତ ହେଉଅଛି । କାର୍ଯ୍ଯକ୍ଷମ ହୋଇପାରିନଥିବା ୧୮୦ ଗୋଟି ଖଣିର ବୈଧାନିକ ଆବଶ୍ୟକତା କୁ ଅନୁଧ୍ୟାନ କରି ଆବଶ୍ଯକୀୟ ବିଧିପ୍ରଯୁକ୍ତ କାର୍ଯ୍ୟ ଏବଂ ତ୍ଵରିତ ଅନୁପାଳନ ମାଧ୍ୟମରେ ଏହି ଖଣିଗୁଡିକୁ କାର୍ଯ୍ୟକ୍ଷମ କରାଇବାକୁ ଆଗାମୀ ଦିନରେ ପ୍ରୟାସ କରାଯିବ ।
ରାଜ୍ୟରେ 2000-01 ଠାରୁ 2010-11ଆର୍ଥିକ ବର୍ଷ ମଧ୍ୟରେ ଖଣିଜ ଉତ୍ପାଦନରେ ଅନେକ ଅନିୟମିତତା ପରିଲକ୍ଷିତ ହୋଇଥିଲା ଏବଂ ଏଥିନିମନ୍ତେ କେଦ୍ର ସରକାର ଶାହା କମିଶନ୍କୁ ନିଯୁକ୍ତ କରିଥିଲେ ଏବଂ ପରେ ପରେ ମାନ୍ୟବର ସର୍ବୋଚ୍ଚ ନ୍ୟାୟାଳୟ ଏହି ସମ୍ବନ୍ଧିତ ଯାଚିକା ଗ୍ରହଣ କରି ଏହି ଆରୋପିତ ଖଣିଜ ଉତ୍ତୋଳନର ଅନିୟମିତତା ର ସଂପୂର୍ଣ୍ଣ ଅନୁସନ୍ଧାନ ନିମନ୍ତେ ରିଟ ପିଟିସନ 114/2014 ରେ କେନ୍ଧୀୟ କ୍ଷମତାପନ୍ନ କମିଟି(CEC)ଙ୍କୁ ନିଯୁକ୍ତ କରିଥିଲେ। ମାନ୍ୟବର ସର୍ବୋଚ୍ଚ ନ୍ୟାୟାଳୟ ଓଡିଶା ରାଜ୍ୟରେ ଏଭଳି ବେଆଇନ ଭାବରେ ଖଣିକାର୍ଯ୍ୟକୁ ସଂପୂର୍ଣ୍ଣ ବନ୍ଦ କରିବା ଉଦ୍ଦେଶ୍ୟରେ କେନ୍ଦ୍ରୀୟ କ୍ଷମତାପନ୍ନ କମିଟି ଙ୍କ ରିପୋର୍ଟ ଆଧାରରେ ବୈଧାନିକ ଅନୁମତି ପ୍ରାପ୍ତ ନହୋଇ ଓ ଜଙ୍ଗଲ ଓ ପରିବେଶର ଜନିତ ଅନୁମତି ର ଉଲ୍ଲଂଘନ କରି ଯେଉଁ ଖଣି ପଟ୍ଟାଦାର ଲୌହ ଓ ମାଙ୍ଗାନିଜ ତଥା ଅନ୍ୟାନ୍ୟ ଖଣିଜ ପଦାର୍ଥ ଖଣି ର ଖଣିକାର୍ଯ୍ୟ କରିଥିଲେ, ସେମାନଙ୍କୁ ଖଣିଜ ର ଶତ ପ୍ରତିଶତ ମୂଲ୍ୟ MMDR Act ର ଧାରା ୨୧(୫) ଅନୁସାରେ କ୍ଷତିପୂରଣ ଆକାରରେ ପଇଠ କରିବାକୁ ନିର୍ଦ୍ଦେଶ ଦେଇଥିଲେ, ଯାହାର ଅନୁପାଳନ କରାଯାଉଅଛି ।
ରାଜ୍ୟର ଖଣି ପଟ୍ଟାଧାରୀଙ୍କ ଠାରୁ କ୍ଷତିପୂରଣ ଜୋରିମାନା ବାବଦରେ ଇସି/ଏଫସି ଉଲ୍ଲଂଘନ ନିମନ୍ତେ ଟ୧୮୧୬୯କୋଟି ୧୪ଲକ୍ଷ ୮୫୬ଟଙ୍କା ର ଜୋରିମାନା କରଯାଇଥିଲାବେଳେ ସେଥିରୁ ସୁଧ ସହିତ ୧୬୧୦୩କୋଟି ୯୬ଲକ୍ଷ ୧୧ହଜାର ୪୪୬ଟଙ୍କା ଅଦ୍ୟାବଧି ଆଦାୟ ହୋଇଅଛି ଏବଂ MP/CTO ଉଲ୍ଲଂଘନ ନିମନ୍ତେ ୧୮୯୦କୋଟି୮୩ଲକ୍ଷ ୩ହଜାର ୨୧୮ଟଙ୍କା ଜୋରିମାନା କରାଯାଇଥିବା ବେଳେ ୧୧୦୧କୋଟି ୬୯ଲକ୍ଷ ୭୯ହଜାର ୨୬୦ଟଙ୍କା ଅଦ୍ୟାବଧି ଆଦାୟ କରାଯାଇପାରିଛି।

୨୦୨୩-୨୪ ଆର୍ଥିକ ବର୍ଷରେ ୪୩୦.୨୨୫ ନିୟୁତ ଟନ ଖଣିଜ ପଦାର୍ଥ ପ୍ରେରଣ କରାଯାଇଛି ଏବଂ ୪୩୫.୧୯୯ ନିୟୁତ ଟନ ପଦାର୍ଥ ଉତ୍ପାଦନ କରାଯାଇଛି। କାର୍ଯ୍ୟକ୍ଷମ ୩୩ ଗୋଟି କୋଇଲା ଖଣିରୁ ୨୦୨୩-୨୪ ଆର୍ଥିକ ବର୍ଷରେ ୨୦୭.୯୦ ମିଲିୟନ ଟନ ଉତ୍ପାଦନ ହୋଇଥିବା ବେଳେ ୨୧୨.୯୮ ନିୟୁତ ଟନ ପ୍ରେରଣ ହୋଇଛି । ୨୦୨୩-୨୪ ଆର୍ଥିକ ବର୍ଷରେ ସମୁଦାୟ ଖଣି ରାଜସ୍ୱ ବାବଦକୁ ମୋଟ ୪୬୩୯୬. ୨୭ କୋଟି ଟଙ୍କା ଆଦାୟ ହୋଇଛି । ୨୦୨୪-୨୫ ଆର୍ଥିକ ବର୍ଷରେ ୩୧ ଜୁଲାଇ, ୨୦୨୪ ସୁଦ୍ଧା ୧୫୩.୮୯୫ ନିୟୁତ ଟନ ଖଣିଜ ପଦାର୍ଥ ପ୍ରେରଣ କରାଯାଇଛି ଏବଂ ୧୫୭.୮୧୭ ନିୟୁତ ଟନ ପଦାର୍ଥ ଉତ୍ପାଦନ କରାଯାଇଛି। ୨୦୨୪-୨୫ ଆର୍ଥିକ ବର୍ଷରେ ୩୧ ଜୁଲାଇ, ୨୦୨୪ ସୁଦ୍ଧା ଖଣି ରାଜସ୍ୱ ବାବଦ କୁ ୧୬୬୮୩.୩୫ କୋଟି ଟଙ୍କା ଆଦାୟ ହୋଇଛି।

ଚଳିତ ଆର୍ଥିକ ବର୍ଷ ୨୦୨୪-୨୫ ରେ ପର୍ଯ୍ୟାୟକ୍ରମେ ୩୦ ଗୋଟି ଗୁରୁ ଖଣିଜ ବ୍ଲକ ନିଲାମ ହେବାକୁ ଯୋଜନା କରାଯାଇଛି। ସେଥି ମଧ୍ୟରୁ ୧୦ ଗୋଟି ଗୁରୁ ଖଣିଜ ବ୍ଲକର ନିଲାମ ପାଇଁ ପ୍ରକ୍ରିୟା ଜାରୀ ରହିଛି ।

ବର୍ତ୍ତମାନ ସୁଦ୍ଧା ରାଜ୍ୟରେ ମୋଟ କାର୍ଯ୍ୟକ୍ଷମ କରୁଥିବା ୫୩ ଗୋଟି ଇସ୍ପାତ କାରଖାନା ମଧ୍ୟରୁ ଚୁକ୍ତିନାମା ସ୍ବାକ୍ଷରିତ ମାଧ୍ୟମରେ ୩୫ ଗୋଟି କାରଖାନା ଏବଂ ଅଣ- ଚୁକ୍ତିନାମା ମାଧ୍ୟମରେ୧୮ ଗୋଟି କାରଖାନା କାର୍ଯ୍ୟ କରୁଛି । ଏହି ଇସ୍ପାତ କାରଖାନା ଗୁଡିକର ମୋଟ ସ୍ଥାପିତ କ୍ଷମତା ହେଉଛି, ୩୫.୭୧ ଏମ. ଟି. ପି.ଏ (Million Ton Per Annuam) ।

ବିଗତ ଦିନରେ ଆମ ସହଭାଗିତାରେ ଚାଲିଥିବା ରାଜ୍ୟ ସରକାରଙ୍କ ସମୟରେ ରାଜ୍ୟରେ ଆର୍ଥିକ ସମ୍ବଳର ସ୍ୱଳ୍ପତା କୁ ଦୃଷ୍ଟି ରେ ରଖି ତଥା ରାଜ୍ୟର ଭିତ୍ତିଭୂମି, ଶିକ୍ଷା, ନିଯୁକ୍ତି ତଥା ରାଜ୍ୟର ଗ୍ରାମୀଣ, ଅନୁନ୍ନତ ଏବଂ ଖଣି ଅଞ୍ଚଳରେ ସାମାଜିକ ଓ ଆର୍ଥିକ ବିକାଶ ନିମନ୍ତେ ଖଣିଜ ଦ୍ରବ୍ୟ ର ବ୍ୟବସାୟ ଓ ବିପଣନ ରୁ ଅତିରିକ୍ତ ସମ୍ବଳ ସଂଗ୍ରହ ଉଦ୍ଦେଶ୍ୟରେ Orissa Rural Infrastructure and Socio-Economic Development Act, 2004 ପ୍ରଣୟନ କରିଥିଲେ ଏବଂ ଏହାକୁ କାର୍ଯ୍ୟକାରୀ କରିବା ନିମନ୍ତେ Orissa Rural Infrastructure and Socio-Economic Development Rules, 2005 ପ୍ରସ୍ତୁତ କରିଥିଲେ । ଏହି ଆଇନ ରେ ରାଜ୍ୟରେ ଖଣି ଥିବା ଜମି ଉପରେ ବା ଯେଉଁ ଜମି ରେ ଖଣି ଖନନ ହେଉଅଛି, ତାହାର ବାର୍ଷିକ ମୂଲ୍ୟ ଉପରେ ଟିକସ ବସାଇବା ନିମନ୍ତେ ରାଜ୍ୟ ସରକାର ସ୍ଥିର କରିଥିଲେ। କିନ୍ତୁ ଏହାର ବୈଧତାକୁ ବିରୋଧ କରି ନାଲକୋ ଏବଂ ଅନ୍ୟ ଖଣି ପଟ୍ଟାଦାର ମାନ୍ୟବର ଓଡିଶା ଉଚ୍ଚ ନ୍ୟାୟାଳୟଙ୍କ ନିକଟରେ 7991 of 2005 ଏବଂ ଅନ୍ୟ ମାମଲା ସମୂହ ଦାୟର କରିଥିଲେ ଏବଂ ମାନ୍ୟବର ଉଚ୍ଚ ନ୍ୟାୟାଳୟ ତାଙ୍କର ୦୫.୧୨.୨୦୦୫ତାରିଖ ରାୟରେ ରାଜ୍ୟ ସରକାରଙ୍କ ଦ୍ଵାରା ପ୍ରଣୀତ ଆଇନକୁ ରାଜ୍ୟ ସରକାରଙ୍କ କ୍ଷମତା ବହିର୍ଭୂତ ବୋଲି ଦର୍ଶାଇ ରଦ୍ଦ କରିଦେଲେ । ଏହା ବିରୁଦ୍ଧରେ ରାଜ୍ୟ ସରକାର ମାନ୍ୟବର ସର୍ବୋଚ୍ଚ ଅଦାଲତଙ୍କ ନିକଟରେ SLP (C) No. 5264 / 2006 ଋଜୁ ଯାହାର ବିଚାର କରି ମାନ୍ୟବର ସର୍ବୋଚ୍ଚ ଅଦାଲତ ୨୫.୦୭.୨୦୨୪ତାରିଖରେ ରାୟ ପ୍ରଦାନ କଲେ ଯେ, ସାମ୍ବିଧାନିକ ବ୍ୟବସ୍ଥା ଅନୁସାରେ ରାଜ୍ୟ ମାନଙ୍କର ଖଣିଜ ପଦାର୍ଥ ଓ ଖଣି ସଂଲଗ୍ନ ଜମି ଉପରେ ଟିକସ ବସାଇବାର ବୈଧାନିକ ଅଧିକାର ରହିଛି। ପୁନଶ୍ଚ ଏହାର କାର୍ଯ୍ଯକାରିତା ନିମନ୍ତେ ମାନ୍ୟବର ସର୍ବୋଚ୍ଚ ନ୍ୟାୟାଳୟ ତା୧୪.୦୮.୨୦୨୪ରିଖରେ ସ୍ପଷ୍ଟ କାଲେ ଯେ ରାଜ୍ୟ ମାନେ ଏହି ଟିକସ ପିଛିଲା ଭାବେ ତା୦୧.୦୪.୨୦୦୫ରିଖ ଠାରୁ ହୋଇଥିବା କାରବାର ଉପରେ ଲାଗୁ କରିପାରିବେ ଏବଂ ଧାର୍ଯ୍ୟ ଦେୟ ଖଣି ମାଲିକ ମାନଙ୍କ ଠାରୁ ତା୦୧.୦୪.୨୦୨୬ରିଖ ପରେ ବାରବର୍ଷର ବାର୍ଷିକ କିସ୍ତିସୂତ୍ରରେ ଅସୁଲ କରିପାରିବେ। ଏହି ମାମଲାରେ ରାଜ୍ୟର ସ୍ବାର୍ଥକୁ ଅଗ୍ରାଧିକାର ଦେଇ ଯଥୋଚିତ କାର୍ଯ୍ଯପନ୍ଥା ସ୍ଥିର କରାଯିବ।

ରାଜ୍ୟର ମହଜୁଦ ରହ଼ିଥିବା ଖଣ଼ିଜ ସମ୍ପଦର ଅନୁସନ୍ଧାନ, ଉତ୍ତୋଳନ ଏବଂ ଏହାର ମୂଲ୍ୟବର୍ଦ୍ଧନ କର଼ିବା ଉଦେଶ୍ୟରେ ଓଡିଶା ସରକାର ଏବଂ ଭାରତ ସରକାରଙ୍କ ମ଼ିଳ଼ିତ ଉଦ୍ୟୋଗ କମ୍ପାନୀ ଭାବରେ ଓଡିଶା ଖଣ଼ିନ଼ିଗମ (ଓଏମସ଼ି) ୧୯୫୬ ମସ଼ିହା ମଇ ମାସ ୧୬ ତାର଼ିଖରେ ପ୍ରତ଼ିଷ୍ଠା ହୋଇଥିଲା। ୧୭/୧୧/୧୯୬୧ ତାରିଖ ଠାରୁ ପରିଗଣିତ ହୋଇଥିବା ଓଡିଶା ସରକାରୀ ଉଦ୍ୟୋଗ ଓଡିଶା ଖଣି ନିଗମ ଲିମିଟେଡ(OMC Limited), ରାଜ୍ୟରେ ଥିବା ଶିଳ୍ପଗୁଡିକର ଆବଶ୍ୟକତା ପୂରଣ କରୁଛି । ଉନ୍ନତମାନର କାର୍ଯ୍ୟକଳାପ ପାଇଁ ଏହାକୁ ଏକ ଗୋଲ୍ଡ୍ କାଟାଗୋରୀ ଷ୍ଟେଟ୍ ପି.ଏସ୍.ୟୁ. ଭାବରେ ଶ୍ରେଣୀଭୁକ୍ତ କରାଯାଇଛି
ଲୁହା ପଥର, କ୍ରୋମଇଟ, ବକ୍ସାଇଟ ଓ ମାଙ୍ଗାନିଜ ର ୩୭ ଗୋଟି ଖଣି ଲିଜ ବର୍ତ୍ତମାନ ଓଡିଶା ଖଣି ନିଗମ ଅଧୀନରେ ଅଛି l ୨୦୨୩-୨୪ ଆର୍ଥିକ ବର୍ଷରେ ଓଡିଶା ଖଣି ନିଗମ ୩୭.୫୯ ନିୟୁତ ଟନ ଖଣିଜ ପଦାର୍ଥ ଉତ୍ତୋଳନ ସହିତ 43.5 ନିୟୁତ ଖଣିଜ ପଦାର୍ଥ ବିକ୍ରୟ କରିଅଛି। ୨୦୨୩- ୨୪ ଆର୍ଥିକ ବର୍ଷରେ ଓଡିଶା ଖଣି ନିଗମ ଟ.23,500,58 କୋଟି ଟଙ୍କାର ଖଣି ରାଜସ୍ୱ ଆଦାୟ କରିଅଛି । OMC ସାମାଜିକ ଦାୟିତ୍ୱ ବୋଧ ଏବଂ ପାରିପାର୍ଶିକ ବିକାଶ ମୂଳକ କାର୍ଯ୍ୟକ୍ରମ ପାଇଁ 128.16 କୋଟି ଟଙ୍କା ଖର୍ଚ୍ଚ କରାଯାଇଛି I ୨୦୨୫ ମସିହା ସୁଦ୍ଧା ଓଡିଶା ଖଣି ନିଗମ ୫୦ ମିଲିୟନ ଟନ ଖଣିଜ ପଦାର୍ଥ ଉତ୍ତୋଳନ କରି ଜାତୀୟ ସ୍ତରରେ ଏହାର ଶ୍ରେଷ୍ଠତ୍ଵ ପ୍ରତିପାଦନ ପାଇଁ ଦୃଢ ନିଶ୍ଚିତ ଅଛି । ଆର୍ଥିକ ବର୍ଷ ୨୦୨୪-୨୫ରେ ୪୩.୭୩ ନିୟୁତ ଟନ ଖଣିଜ ପଦାର୍ଥ ଉତ୍ତୋଳନ ଏବଂ ୪୪.୨୭ ନିୟୁତ ଟନ ଖଣିଜ ପଦାର୍ଥ ବିକ୍ରୟ ସହିତ ଓଡିଶା ଖଣି ନିଗମ ୨୩୭୫୪ କୋଟି ଟଙ୍କାର କାରବାର କରିବା ପାଇଁ ଲକ୍ଷ ଧାର୍ଯ୍ୟ କରାଯାଇଅଛି।
ରାଜ୍ୟର ଖଣିଜ ଭିତ୍ତିକ ଶିଳ୍ପ ସମୂହକୁ କଞ୍ଚାମାଲ ଯୋଗାଇଦେବା ନିମନ୍ତେ ଓଡିଶା ଖଣି ନିଗମ ଏକ ପ୍ରମୁଖ ଭୂମିକା ନିର୍ବାହ କରୁଛି । ୨୦୨୩-୨୪ ଆର୍ଥିକ ବର୍ଷରେ ଏହି ନିଗମ ୩୭.୫୯ ନିୟୁତ ଟନ ଖଣିଜ ପଦାର୍ଥ ଉତ୍ତୋଳନ ସହିତ ୪୩.୫ ନିୟୁତ ଟନ ଖଣିଜ ପଦାର୍ଥ ବିକ୍ରୟ କରିଅଛି। ଏହି ଆର୍ଥିକ ବର୍ଷରେ ନିଗମ ପ୍ରାୟତଃ ୨୩,୫୦୦ କୋଟିର ଖଣିଜ ରାଜସ୍ୱ ଅଦାୟକରି, ଦେଶର ଏକ ସର୍ବବୃହତ ଖଣି କମ୍ପାନୀ ଭାବରେ ନିଜକୁ ପତିଷ୍ଠିତ କରିପାରିଛି । ନୂତନ ଜ୍ଞାନ କୌଶଳର ପ୍ରୟୋଗ ସହିତ ନିଅବଦାନ ଗମ ନିଜର ସାମାଜିକ ଦାୟିତ୍ୱବୋଧ ଖଣିଜ କମ୍ପାନୀଭାବେ ଏହା ସ୍ୱାସ୍ଥ୍ୟ, ପରିମଳ, ଶିକ୍ଷା, ପାନୀୟ ଜଳ ଯୋଗାଣ, ଗମନା ଗମନ, ବିଜୁଳି, ଗୃହ ନିର୍ମାଣ ତଥା ଅନ୍ୟ ଉପାଦେୟ କ୍ଷେତ୍ରରେ ଏହାର ଫଳପ୍ରସୁ ଯୋଗଦାନ ଦେଇଚାଲିଛି । କ୍ଷୁଦ୍ର ଶିଳ୍ପୋଦ୍ୟୋଗୀଙ୍କ ନିମନ୍ତେ ଓଡିଶା ଖଣି ନିଗମ ଦ୍ଵାରା ଯୋଗାଇ ଦିଆଯାଉଥିବା କଞ୍ଚାମାଲ ଆଗାମୀ ଦିନରେ ଅଧିକରୁ ଅଧିକ କରାଯିବା ନିମନ୍ତେ ପ୍ରୟାସ ଓ ପ୍ରୋତ୍ସାହନ ଜାରି ରହିବ।
ଆର୍ଥିକ ବର୍ଷ ୨୦୨୪-୨୫ ବଜେଟରେ ଇସ୍ପାତ ଓ ଖଣି ବିଭାଗ ପାଇଁ ମୋଟ ୪୫୬.୩୭୭୯ କୋଟି ଟଙ୍କା(୪୫୬ କୋଟି ୩୭ ଲକ୍ଷ ୭୯ ହଜାର ଟଙ୍କା) ବ୍ୟୟ ବରାଦ କରାଯାଇଛି ଯାହାକି ପୂର୍ବ ବର୍ଷ ଅପେକ୍ଷା ଶତକଡା ୪୦.୦୨ ପ୍ରତିଶତ ଅଧିକ ଅଟେ । ସେଥି ମଧ୍ୟରୁ ପ୍ରଶାସନିକ ଖର୍ଚ୍ଚ ପାଇଁ ବ୍ୟୟ ବରାଦ (Administrative Expenditure) ବାବଦକୁ ୯୧.୮୪୬୬ କୋଟି ଟଙ୍କା ଓ ଯୋଜନା ବ୍ୟୟ ବରାଦ (Programme Expenditure) ବାବଦରେ ୩୬୪.୫୩୧୩ କୋଟି ଟଙ୍କା ରଖାଯାଇଛି ।

Nation

ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀର ୧୩ତମ ବ୍ୟାଚ୍ କ୍ୟାଡେଟ୍ ସବ୍-ଇନ୍ସପେକ୍ଟରମାନଙ୍କ ଦୀକ୍ଷାନ୍ତ ସମାରୋହ

Published

2 weeks ago

September 4, 2026

odishaadmin

ଭୁବନେଶ୍ୱର : ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀ ଠାରେ ୧୩ତମ ବ୍ୟାଚ୍ କ୍ୟାଡେଟ୍ ସବ୍-ଇନ୍ସପେକ୍ଟରମାନଙ୍କ ଦୀକ୍ଷାନ୍ତ ସମାରୋହ ଆଜି ଅନୁଷ୍ଠିତ ହୋଇଯାଇଛି । ଏହି ସମାରୋହରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ଯୋଗଦେଇ ଦୁଇ ବର୍ଷର କଠୋର ଇନ୍‌ଡୋର ଓ ଆଉଟ୍‌ଡୋର ପ୍ରଶିକ୍ଷଣ ସଫଳତାର ସହ ସମ୍ପୂର୍ଣ୍ଣ କରିଥିବା ୩୩୬ ଜଣ ନବନିଯୁକ୍ତ କ୍ୟାଡେଟ୍ ସବ୍-ଇନ୍ସପେକ୍ଟରଙ୍କୁ ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି । ଏହି ବ୍ୟାଚ୍‌ରେ ୭୦ ଜଣ ମହିଳା ସବ୍-ଇନ୍ସପେକ୍ଟର ସାମିଲ ହୋଇଥିବାରୁ ମୁଖ୍ୟମନ୍ତ୍ରୀ ଆନନ୍ଦ ପ୍ରକାଶ କରିବା ସହ ଏହା ଓଡ଼ିଶାର ନାରୀ ସଶକ୍ତିକରଣ ଓ ପରିବର୍ତ୍ତିତ ସାମାଜିକ ଚିତ୍ରର ଏହା ଏକ ଉଜ୍ଜ୍ୱଳ ପ୍ରତିଫଳନ ବୋଲି କହିଛନ୍ତି ।

ଦୀକ୍ଷାନ୍ତ ସମାରୋହକୁ ସମ୍ବୋଧିତ କରିବା ଅବସରରେ ମୁଖ୍ୟମନ୍ତ୍ରୀ ଆଧୁନିକ ଅପରାଧ, ଟେକ୍ନୋଲୋଜିର ବ୍ୟବହାର ଓ ସାଇବର ଠକେଇର ମୁକାବିଲା ପାଇଁ ଓଡ଼ିଶା ପୋଲିସ ନିଜକୁ ନିରନ୍ତର ଅପ୍‌ଡେଟ୍ କରୁଥିବାରୁ ସନ୍ତୋଷ ପ୍ରକାଶ କରିଥିଲେ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମାର୍ଗଦର୍ଶନ ଓ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଦକ୍ଷ ପରିଚାଳନାରେ ରାଜ୍ୟରୁ ମାଓ ଓ ନକ୍ସଲ ହିଂସା ସମ୍ପୂର୍ଣ୍ଣ ଦମନ ହୋଇପାରିଛି ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଥିଲେ ।

ଆଗାମୀ ଦଶ ବର୍ଷ ମଧ୍ୟରେ ସମୃଦ୍ଧ ଓଡ଼ିଶା ଗଠନ ପାଇଁ ଶିଳ୍ପାୟନ ଏବଂ ଶାନ୍ତି-ଶୃଙ୍ଖଳା ଅପରିହାର୍ଯ୍ୟ ବୋଲି ଦର୍ଶାଇ ମୁଖ୍ୟମନ୍ତ୍ରୀ ପୋଲିସ ବିଭାଗର ଆଧୁନିକୀକରଣ ଓ ମାନବ ସମ୍ବଳ ବିକାଶ ଉପରେ ଗୁରୁତ୍ୱାରୋପ କରିଥିଲେ । ଗତ ଦୁଇ ବର୍ଷ ମଧ୍ୟରେ ପୋଲିସ ବିଭାଗରେ ୧୭,୭୯୪ଟି ନୂତନ ପଦବୀ ସୃଷ୍ଟି କରାଯିବା ସହ ୫,୮୧୭ଟି ପଦବୀ ପୂରଣ କରାଯାଇଛି ଏବଂ ଥାନାଗୁଡ଼ିକର କାର୍ଯ୍ୟଦକ୍ଷତା ବୃଦ୍ଧି ପାଇଁ ଯାନବାହାନ ଓ ଇନ୍ଧନ ଭତ୍ତା ପ୍ରଦାନ କରାଯାଉଛି । ଏହା ସହିତ ୨୦୨୯ ସୁଦ୍ଧା ଓଡ଼ିଶାକୁ ‘ନିଶାମୁକ୍ତ ରାଜ୍ୟ’ରେ ପରିଣତ କରିବା ପାଇଁ ସରକାର ସଂକଳ୍ପବଦ୍ଧ ବୋଲି ସେ ଦୋହରାଇଥିଲେ ।

ପୋଲିସ ବାହିନୀକୁ ଅଧିକ କ୍ରିୟାଶୀଳ କରିବା ପାଇଁ ମୁଖ୍ୟମନ୍ତ୍ରୀ SMART POLICING ନୀତି ଆପଣାଇବାକୁ ଆହ୍ୱାନ ଦେବା ସହ ନବନିଯୁକ୍ତ ଅଧିକାରୀମାନଙ୍କୁ ତିନୋଟି ଗୁରୁମନ୍ତ୍ର ପ୍ରଦାନ କରିଛନ୍ତି । ସରକାରଙ୍କ ‘ଶୂନ୍ୟ ସହନଶୀଳତା’ ନୀତିକୁ ଆଧାର କରି ଦୁର୍ନୀତିରୁ ସମ୍ପୂର୍ଣ୍ଣ ଦୂରେଇ ରହିବା, ୟୁନିଫର୍ମ ସର୍ଭିସରେ ସର୍ବୋଚ୍ଚ ଶୃଙ୍ଖଳା ବଜାୟ ରଖିବା ଏବଂ କ୍ଷମତାର ଅପବ୍ୟବହାର ନକରି ନିର୍ଦ୍ଦୋଷଙ୍କୁ ସୁରକ୍ଷା ଓ ଅପରାଧୀଙ୍କୁ ଆଇନ ଅନୁଯାୟୀ ଦଣ୍ଡ ଦେବା ପାଇଁ ସେ ପରାମର୍ଶ ଦେଇଥିଲେ ।

ସମାରୋହରେ ପୋଲିସ ମହାନିର୍ଦ୍ଦେଶକ ଶ୍ରୀ ବିନୟତୋଷ ମିଶ୍ର କହିଥିଲେ ଯେ ପୋଲିସ ଅଧିକାରୀମାନେ ଜନସାଧାରଣଙ୍କୁ ନ୍ୟାୟ ପ୍ରଦାନ କରିବା ପାଇଁ କାର୍ଯ୍ୟ କରିବା ଉଚିତ। ପୋଲିସ ସେବାରେ ଅନେକ ସମସ୍ୟା ଓ ଅସୁବିଧାର ସମ୍ମୁଖୀନ ହେବାକୁ ପଡ଼ିଲେ ମଧ୍ୟ, ସେମାନଙ୍କୁ ସମ୍ପୂର୍ଣ୍ଣ ସାହସିକତା, ନିଷ୍ଠା ଓ ସାଧୁତାର ସହିତ ନିଜର ଦାୟିତ୍ୱ ତୁଲାଇବାକୁ ହେବ। ଏହା ସହିତ ସାଇବର ଅପରାଧ ଭଳି ଆଧୁନିକ ସମସ୍ୟାର ମୁକାବିଲା କରିବା ପାଇଁ ପ୍ରଯୁକ୍ତିବିଦ୍ୟା ଏବଂ ସ୍ମାର୍ଟ ପୋଲିସିଂ ବ୍ୟବସ୍ଥାର ଉପଯୋଗ କରିବା ଜରୁରୀ ଅଟେ। ନକ୍ସଲ ବିରୋଧୀ ଅଭିଯାନ କ୍ଷେତ୍ରରେ ଓଡ଼ିଶା ପୋଲିସ ଉଲ୍ଲେଖନୀୟ ସଫଳତା ହାସଲ କରିଛି। ଏହି ଅସାଧାରଣ କୃତିତ୍ୱ ଓ ସଫଳତା ପାଇଁ ସେ ସମଗ୍ର ଓଡ଼ିଶା ପୋଲିସ ବାହିନୀକୁ ଧନ୍ୟବାଦ ଜଣାଇଥିଲେ ।

ବିଜୁ ପଟ୍ଟନାୟକ ରାଜ୍ୟ ପୋଲିସ ଏକାଡେମୀର ନିର୍ଦ୍ଦେଶକ ତଥା ପୋଲିସ ମହାନିରୀକ୍ଷକ ଶ୍ରୀ ଅନୁପ କୁମାର ସାହୁ ସ୍ୱାଗତ ଅଭିଭାଷଣ ଦେବା ସହ ବାର୍ଷିକ ବିବରଣୀ ପାଠ କରିଥିଲେ ।

ଏହି ଦୀକ୍ଷାନ୍ତ ସମାରୋହରେ ବିଭିନ୍ନ ବିଭାଗରେ ଉତ୍କର୍ଷ ହାସଲ କରିଥିବା କୃତୀ କ୍ୟାଡେଟ୍‌ମାନଙ୍କୁ ମୁଖ୍ୟମନ୍ତ୍ରୀ ସମ୍ମାନିତ କରିଥିଲେ । ଏଥିରେ ପି. ନଳିନୀ ରାଓଙ୍କୁ ସର୍ବାଧିକ ନମ୍ବର ହାସଲ କରି ରାଜ୍ୟପାଳଙ୍କ ପଦକ, ଟ୍ରଫି ସହ ୧୦,୦୦୦ ଟଙ୍କାର ନଗଦ ପୁରସ୍କାର ରାଶି ମୁଖ୍ୟମନ୍ତ୍ରୀ ପ୍ରଦାନ କରିଥିଲେ । ଏଥି ସହ ତେଜସ୍ୱିନୀ ମହନ୍ତରାୟ, ଯୁଧିଷ୍ଠିର ବେହେରା, ଲକ୍ଷ୍ମଣ କୁମାର ମହନ୍ତ, ସସ୍ମିତା ଖୁଣ୍ଟିଆ, ନିହାରିକା ତ୍ରିପାଠୀ ଓ ଆଶୁତୋଷ ନାୟକଙ୍କୁ ପୋଲିସ ପ୍ରଶିକ୍ଷଣରେ ଉତ୍ତମ ପ୍ରଦର୍ଶନ ନିମନ୍ତେ ମୁଖ୍ୟମନ୍ତ୍ରୀ ଟ୍ରଫି ସହ ପୁରସ୍କାର ପ୍ରଦାନ କରିଥିଲେ ।

Nation

ବଜେଟ ଖର୍ଚ୍ଚ ବୃଦ୍ଧି କରିବାକୁ ସଚିବମାନଙ୍କୁ କହିଲେ ମୁଖ୍ୟ ଶାସନ ସଚିବ

Published

2 weeks ago

September 3, 2026

odishaadmin

ଭୁବନେଶ୍ୱର: ବଜେଟ ଖର୍ଚ୍ଚ ବୃଦ୍ଧି କରିବାକୁ ଆଜି ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ବିଭାଗୀୟ ସଚିବମାନଙ୍କୁ କହିଛନ୍ତି ।

ମୁଖ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଚିବସ୍ତରୀୟ ବୈଠକରେ ବିଭିନ୍ନ ବିଭାଗର ବ୍ୟୟ ସ୍ଥିତି ସମୀକ୍ଷା କରି ଅନୁମୋଦିତ ବଜେଟ୍‌ ବ୍ୟବସ୍ଥା ଅନୁଯାୟୀ ବିକାଶମୂଳକ ଯୋଜନା ଓ ପ୍ରକଳ୍ପଗୁଡ଼ିକର କାର୍ଯ୍ୟାନ୍ୱୟନକୁ ତ୍ୱରାନ୍ୱିତ କରି ବ୍ୟୟ ହାର ବୃଦ୍ଧି କରିବାକୁ ସଚିବମାନଙ୍କୁ ପରାମର୍ଶ ଦେଇଥିଲେ । ନିର୍ଦ୍ଧାରିତ ଲକ୍ଷ୍ୟ ଅନୁଯାୟୀ ବ୍ୟୟ କରିବା ସହ କାର୍ଯ୍ୟକ୍ରମର ଗୁଣାତ୍ମକ ଓ ଫଳାଫଳଭିତ୍ତିକ କାର୍ଯ୍ୟାନ୍ୱୟନ ଉପରେ ଗୁରୁତ୍ୱ ଦେବାକୁ ସେ କହିଥିଲେ ।

ବୈଠକରେ ଅର୍ଥ ବିଭାଗ ପକ୍ଷରୁ ରାଜ୍ୟର ଆୟ ଓ ବ୍ୟୟ ସ୍ଥିତି ସମ୍ପର୍କରେ ବିସ୍ତୃତ ଉପସ୍ଥାପନ କରାଯାଇଥିଲା । ଚଳିତ ଆର୍ଥିକ ବର୍ଷରେ ଅଗଷ୍ଟ ମାସ ଶେଷ ସୁଦ୍ଧା ଗତ ବର୍ଷର ଏହି ସମୟ ତୁଳନାରେ ରାଜ୍ୟର ମୋଟ ବ୍ୟୟ ଓ କାର୍ଯ୍ୟକ୍ରମ ବ୍ୟୟରେ ଉନ୍ନତି ଘଟିଥିବା ବେଳେ ପୁଞ୍ଜି ବ୍ୟୟରେ ମଧ୍ୟ ଉଲ୍ଲେଖନୀୟ ଅଭିବୃଦ୍ଧି ହୋଇଥିବା ଜଣାଯାଇଛି । ସେହିପରି ରାଜ୍ୟର ମୋଟ ରାଜସ୍ୱ ଆଦାୟରେ ମଧ୍ୟ ଗତବର୍ଷ ତୁଳନାରେ ଅଧିକ ଅଭିବୃଦ୍ଧି ରେକର୍ଡ ହୋଇଛି ।

ବୈଠକରେ ଉନ୍ନୟନ କମିଶନର-ତଥା-ଅତିରିକ୍ତ ମୁଖ୍ୟ ଶାସନ ସଚିବ ଦେଓରଂଜନ କୁମାର ସିଂହଙ୍କ ସମେତ ବିଭିନ୍ନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ମାନ୍ୟବର ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ଶାସନ ସଚିବ ଏବଂ ଅନ୍ୟ ବିଭିନ୍ନ ବିଭାଗର ସଚିବମାନେ ଯୋଗଦେଇ ବିଭାଗୀୟ କାର୍ଯ୍ୟକ୍ରମ, ଆର୍ଥିକ ପ୍ରଦର୍ଶନ, ଜନକଲ୍ୟାଣମୂଳକ ପଦକ୍ଷେପ ଏବଂ କାର୍ଯ୍ୟକାରୀ ହେଉଥିବା ବିକାଶମୂଳକ ପ୍ରକଳ୍ପ ସମ୍ପର୍କରେ ଆଲୋଚନା କରିଥିଲେ ।

ବୈଠକରେ ଖୋର୍ଦ୍ଧା ଜିଲ୍ଲାପାଳ ଶ୍ରୀ ଅମ୍ରିତ୍ ଋତୁରାଜ ଜିଲ୍ଲାର ୨୫ଟି ରଣନୀତିକ ପ୍ରକଳ୍ପ ସମ୍ପର୍କରେ ବିସ୍ତୃତ ରୋଡମ୍ୟାପ୍ ଉପସ୍ଥାପନ କରିଥିଲେ । ଖୋର୍ଦ୍ଧା ଜିଲ୍ଲାର ସମନ୍ୱିତ ଓ ଦ୍ରୁତ ବିକାଶ ପାଇଁ ଶିଳ୍ପ, ଭିତ୍ତିଭୂମି, କୃଷି, କ୍ରୀଡ଼ା, ପର୍ଯ୍ୟଟନ, ଐତିହ୍ୟ ଓ ଜ୍ଞାନଭିତ୍ତିକ ବିକାଶକୁ ସମାନ ଗୁରୁତ୍ୱ ଦେଇ ପ୍ରସ୍ତୁତ ରୋଡମ୍ୟାପ୍‌ ସଂପର୍କରେ ଜିଲ୍ଲାପାଳ ଆଲୋକପାତ କରିଥିଲେ । ଜିଲ୍ଲାର ଗ୍ରାମ ପଞ୍ଚାୟତସ୍ତରରେ କଲ୍ୟାଣ ମଣ୍ଡପ, ଗ୍ରାମୀଣ ହାଟ, ମଡେଲ୍‌ ପାର୍କ, ପୋଖରୀ ଭଳି ବହୁମୁଖୀ ସୁବିଧା ସହ ପ୍ରମୁଖ ଉପଯୋଗୀ ମଡେଲ୍ ପ୍ରକଳ୍ପ ବିକଶିତ କରିବା ପାଇଁ ପ୍ରସ୍ତାବ ରଖାଯାଇଛି ।

ବେଗୁନିଆ-ବୋଲଗଡ଼ ଓ ଟାଙ୍ଗୀ ଅଞ୍ଚଳକୁ ଶିଳ୍ପ କ୍ଷେତ୍ର ଭାବେ ବିକଶିତ କରି ନୂଆ ପୁଞ୍ଜିନିବେଶ ଆକର୍ଷଣ, ନିଯୁକ୍ତି ସୁଯୋଗ ସୃଷ୍ଟି ଓ ଏମ୍‌ଏସ୍‌ଏମ୍‌ଇ ଭିତ୍ତିକ ସହାୟକ ଶିଳ୍ପର ବିକାଶ ପାଇଁ ପ୍ରସ୍ତାବ ରଖାଯାଇଛି । ତୃଣମୂଳସ୍ତରରେ ସିଭିକ୍‌ ଓ ଜ୍ଞାନଭିତ୍ତିକ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ଆଧୁନିକ ବ୍ଲକ୍‌ସ୍ତରୀୟ କନଭେନ୍ସନ୍‌ ସେଣ୍ଟରକୁ ଜନସମାଗମ, ଜ୍ଞାନ ବିନିମୟ, ସାଂସ୍କୃତିକ ପ୍ରଦର୍ଶନୀ ଓ ସରକାରୀ କାର୍ଯ୍ୟକ୍ରମର କେନ୍ଦ୍ର ଭାବେ ବିକଶିତ କରିବା ନେଇ ଆଲୋଚନା ହୋଇଥିଲା ।

Nation

ଜାତୀୟ ଶକ୍ତି ସମ୍ମିଳନୀ ୨୦୨୬ରେ ଲିଙ୍ଗ-ସମ୍ବେଦନଶୀଳ ସହରୀ ଯାତାୟାତକୁ ଗୁରୁତ୍ୱ

Published

2 weeks ago

September 2, 2026

odishaadmin

ଭୁବନେଶ୍ୱର: “ଯେତେବେଳେ ମହିଳାମାନେ ଆଗକୁ ବଢ଼ନ୍ତି, ସହର ବି ଆଗକୁ ବଢ଼େ।” ଏହି ଦୃଢ଼ ବାର୍ତ୍ତା ସହିତ ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ ଓଡ଼ିଶାର ସହରୀ ପରିବହନ ବ୍ୟବସ୍ଥାରେ ମହିଳାଙ୍କ ସୁରକ୍ଷା, ସୁଗମତା ଓ ସକ୍ରିୟ ଅଂଶଗ୍ରହଣକୁ ପ୍ରାଥମିକତା ଦେବା ଉପରେ ଗୁରୁତ୍ୱ ଦେଇଛନ୍ତି ।

ଭୁବନେଶ୍ୱରର ମେଫେୟାରରେ ଆୟୋଜିତ ‘ଶକ୍ତି ସମ୍ମିଳନୀ ୨୦୨୬ : ରାଜ୍ୟ ମହିଳା ଓ ଶିଶୁ ବିକାଶ ନେତୃତ୍ୱ କନକ୍ଲେଭ’ ରେ “ସହରୀ ଗମନାଗମନରେ ଲିଙ୍ଗଗତ ମୁଖ୍ୟଧାରା ପାଇଁ ଓଡ଼ିଶାର ପଦକ୍ଷେପ” ବିଷୟରେ ବକ୍ତବ୍ୟ ରଖି ଶ୍ରୀମତୀ ପାଢ଼ୀ କହିଛନ୍ତି ଯେ, ସହରୀ ପରିବହନର ଯୋଜନା, ଡିଜାଇନ୍ ଓ ସେବା ପ୍ରଦାନର ପ୍ରତ୍ୟେକ ସ୍ତରରେ ମହିଳାଙ୍କ ଆବଶ୍ୟକତା ଓ ଅଭିଜ୍ଞତାକୁ କେନ୍ଦ୍ରରେ ରଖିବା ଆବଶ୍ୟକ ।

ସେ କହିଛନ୍ତି ଯେ, ମହିଳାମାନଙ୍କ ପାଇଁ ସୁରକ୍ଷିତ, ନିର୍ଭରଯୋଗ୍ୟ ଓ ସୁଗମ ପରିବହନ ସେମାନଙ୍କ ଶିକ୍ଷା, ନିଯୁକ୍ତି, ଉଦ୍ୟୋଗ, ସ୍ୱାସ୍ଥ୍ୟସେବା ଓ ସାମାଜିକ ସୁଯୋଗ ପାଇବାର କ୍ଷମତାକୁ ସିଧାସଳଖ ପ୍ରଭାବିତ କରେ । “ଯେଉଁ ସହରରେ ଅଧା ଜନସଂଖ୍ୟା ଚଳପ୍ରଚଳ କରିବା ସମୟରେ ନିଜକୁ ସୁରକ୍ଷିତ ଓ ଆତ୍ମବିଶ୍ୱାସୀ ମନେ କରନ୍ତି ନାହିଁ, ସେହି ସହର ପ୍ରକୃତରେ ସମାବେଶୀ ହୋଇପାରିବ ନାହିଁ,” ବୋଲି ସେ କହିଛନ୍ତି ।

ଶ୍ରୀମତୀ ପାଢ଼ୀ କହିଛନ୍ତି ଯେ, ସହରୀ ଗମନାଗମନରେ ଲିଙ୍ଗଗତ ମୁଖ୍ୟଧାରା କେବଳ ନୀତି ଓ ଦସ୍ତାବିଜରେ ସୀମିତ ନ ରହି ଯୋଜନା ପ୍ରସ୍ତୁତିଠାରୁ ଆରମ୍ଭ କରି ଭିତ୍ତିଭୂମି ନିର୍ମାଣ, କାର୍ଯ୍ୟକାରିତା ଓ ସେବା ପ୍ରଦାନ ପର୍ଯ୍ୟନ୍ତ ପ୍ରତ୍ୟେକ ସ୍ତରରେ ପ୍ରତିଫଳିତ ହେବା ଦରକାର । ସୁରକ୍ଷିତ ଓ ସୁଗମ ଜନପରିବହନ, ପଥଚାରୀ-ଅନୁକୂଳ ଭିତ୍ତିଭୂମି, ପର୍ଯ୍ୟାପ୍ତ ଆଲୋକୀକରଣ, ସୁରକ୍ଷିତ ସର୍ବସାଧାରଣ ସ୍ଥାନ, ସହଜ ଶେଷ-ମାଇଲ୍ ସଂଯୋଗ ଏବଂ ଉତ୍ତରଦାୟୀ ପରିବହନ ସେବା ଏକ ମହିଳା-ଅନୁକୂଳ ସହରର ଅତ୍ୟାବଶ୍ୟକ ଅଙ୍ଗ ବୋଲି ସେ ଉଲ୍ଲେଖ କରିଛନ୍ତି ।

ଅଧିବେଶନରେ ଏକ ପ୍ରେରଣାଦାୟୀ ଉଦାହରଣ ଦେଇ ଶ୍ରୀମତୀ ପାଢ଼ୀ ତାଙ୍କ ମହିଳା ଡ୍ରାଇଭରଙ୍କୁ ଉପସ୍ଥିତ ଦର୍ଶକଙ୍କ ସହ ପରିଚିତ କରାଇଥିଲେ । ପାରମ୍ପରିକ ଭାବେ ପୁରୁଷ-ପ୍ରଧାନ ବୋଲି ବିବେଚିତ ହେଉଥିବା ଏକ କ୍ଷେତ୍ରରେ ଜଣେ ମହିଳାଙ୍କ ସଫଳ ଅଂଶଗ୍ରହଣ ରୂଢ଼ିବାଦୀ ଧାରଣାକୁ ଭାଙ୍ଗିବା ସହିତ ଅନ୍ୟ ମହିଳାମାନଙ୍କ ପାଇଁ ମଧ୍ୟ ନୂଆ ସୁଯୋଗର ଦ୍ୱାର ଖୋଲିଥାଏ ବୋଲି ସେ ଦର୍ଶାଇଥିଲେ ।

“ଲିଙ୍ଗଗତ ମୁଖ୍ୟଧାରା କେବଳ ନୀତି ଏବଂ ଦସ୍ତାବିଜ ମଧ୍ୟରେ ସୀମିତ ରହିପାରିବ ନାହିଁ । ଏହା ଆମ ଦୈନନ୍ଦିନ ଜୀବନରେ ଏବଂ ସାର୍ବଜନୀନ ସେବା ଯୋଗାଉଥିବା ଲୋକଙ୍କ କାର୍ଯ୍ୟରେ ଦୃଶ୍ୟମାନ ହେବା ଉଚିତ,” ବୋଲି ଶ୍ରୀମତୀ ପାଢ଼ୀ କହିଛନ୍ତି । ସେ ଆହୁରି କହିଛନ୍ତି ଯେ, ଡ୍ରାଇଭର, ପରିବହନ କର୍ମଚାରୀ, ଯୋଜନାକାରୀ, ପ୍ରଯୁକ୍ତିବିଦ୍ୟା ବିଶେଷଜ୍ଞ ଓ ସେବା ପ୍ରଦାନକାରୀ ଭାବେ ମହିଳାଙ୍କ ଅଧିକ ପ୍ରତିନିଧିତ୍ୱ ସମଗ୍ର ପରିବହନ ବ୍ୟବସ୍ଥାକୁ ଅଧିକ ସମାବେଶୀ, ଉତ୍ତରଦାୟୀ ଓ ଜନକେନ୍ଦ୍ରିକ କରିପାରିବ ।