ଭୁବନେଶ୍ୱର: ଆନ୍ଧ୍ରପ୍ରଦେଶ ଓ ଛତିଶଗଡ଼ର ପୂର୍ବତନ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନଙ୍କ ଦ୍ୱାରା ରଚିତ ଓଡ଼ିଆ ପୁସ୍ତକ ‘ଏ ମାଟି କଥା କହେ’ ଏବଂ ଇଂରାଜୀ ପୁସ୍ତକ ‘ବକ୍ସି ଜଗବନ୍ଧୁ: ଦ ଗ୍ରେଟ୍ କମାଣ୍ଡର’ର ଲୋକାର୍ପଣ ଉତ୍ସବ ଆଜି ଶନିବାର ଏଠାରେ ହୋଇଯାଇଛି।

ପୁସ୍ତକ ଦୁଇଟିକୁ ଉନ୍ମୋଚନ କରିବା ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ ଭାରତୀୟ ରାଜନୀତିର ଏକ ବିଶିଷ୍ଟ ନାମ ତଥା ଓଡ଼ିଶାର ଗର୍ବ ବିଶ୍ୱଭୂଷଣ ହରିଚନ୍ଦନଙ୍କ ଦ୍ୱାରା ରଚିତ ଓଡ଼ିଆ ପୁସ୍ତକ ‘ଏ ମାଟି କଥା କହେ’ ଏବଂ ଇଂରାଜୀ ପୁସ୍ତକ ‘ବକ୍ସି ଜଗବନ୍ଧୁ: ଦ ଗ୍ରେଟ୍ କମାଣ୍ଡର’ର ଶୁଭ ଉନ୍ମୋଚନ ଅବସରରେ ଉପସ୍ଥିତ ହୋଇ ମୁଁ ନିଜକୁ ଗୌରବାନ୍ୱିତ ମନେ କରୁଛି ।

ତାଙ୍କ ଦ୍ୱାରା ରଚିତ ପୁସ୍ତକ ‘ବକ୍ସି ଜଗବନ୍ଧୁ: ଦି ଗ୍ରେଟ୍ କମାଣ୍ଡର’ ଓଡ଼ିଶାର ପାଇକ ବୀର ବକ୍ସି ଜଗବନ୍ଧୁଙ୍କ ବୀରତ୍ୱ ଓ ସଂଘର୍ଷର ଗାଥାକୁ ସାରା ଦେଶବାସୀଙ୍କ ନିକଟରେ ପହଞ୍ଚାଇବ ।

ଏହି ପୁସ୍ତକ ଇତିହାସର ଅନାଲୋଚିତ ପ୍ରସଙ୍ଗଗୁଡ଼ିକୁ ଲୋକଲୋଚନକୁ ଆଣି ନୂତନ ଗବେଷଣାର ଦ୍ୱାର ଖୋଲିବ । ଆମେ ସମସ୍ତେ ଜାଣିଛୁ ଯେ ୧୮୫୭ ମସିହାର ସିପାହୀ ବିଦ୍ରୋହକୁ ଭାରତର ପ୍ରଥମ ସ୍ଵାଧୀନତା ସଂଗ୍ରାମ ଭାବେ ଅଭିହିତ କରାଯାଏ।

କିନ୍ତୁ, ସିପାହୀ ବିଦ୍ରୋହର ୪୦ ବର୍ଷ ପୂର୍ବରୁ ଏହି ଖୋର୍ଦ୍ଧା ମାଟିରେ ଆରମ୍ଭ ହୋଇଥିଲା ସଶସ୍ତ୍ର ପାଇକ ବିଦ୍ରୋହ, ବକ୍ସି ଜଗବନ୍ଧୁଙ୍କ ନେତୃତ୍ଵରେ ଯାହା ବୋଧହୁଏ ସାରା ଦେଶରେ ଏପରି ଏକ ସଶସ୍ତ୍ର ସଂଗ୍ରାମ ଏତେ ବ୍ୟାପକ ଭାବେ ପ୍ରଥମ ଥର ପାଇଁ ହୋଇଥିଲା। କିନ୍ତୁ, ଏହି ସଂଗ୍ରାମକୁ ଯେପରି ଭାବେ ମାନ୍ୟତା ମିଳିବା କଥା ଜାତୀୟ ସ୍ତରରେ ହେଉ କି ଓଡିଶାର ଇତିହାସରେ ହେଉ ତାହା ମିଳିପାରି ନାହିଁ। ତେଣୁ, ଶ୍ରୀଯୁକ୍ତ ହରିଚନ୍ଦନଙ୍କ ଦ୍ଵାରା ରଚିତ ଏହି ପୁସ୍ତକ ପାଇକ ବିଦ୍ରୋହ ବିଷୟରେ ଜାତୀୟ ସ୍ତରରେ ଅଧିକ ଆଲୋକପାତ କରିବା ସହ ପାଇକ ବିଦ୍ରୋହକୁ ଦେଶର ପ୍ରଥମ ସ୍ଵାଧୀନତା ସଂଗ୍ରାମର ମାନ୍ୟତା ଦେବା ପ୍ରୟାସକୁ ଆହୁରି ମଜବୁତ କରିବ।

ବିଶ୍ୱଭୂଷଣ ବାବୁ ଅନେକ ସମୟରେ ବିଭିନ୍ନ ସଭାସମିତିରେ ତାଙ୍କ ବକ୍ତବ୍ୟରେ ବକ୍ସିଙ୍କ ବୀରତ୍ୱ ସମ୍ପର୍କରେ ଆଲୋକପାତ କରିଥାନ୍ତି । ମୁଁ ଅନେକ ସମୟରେ ସେହି ଭାଷଣ ଶୁଣିଛି । ମୁଁ ଦୃଢ଼ ନିଶ୍ଚିତ ଯେ, ବିଶ୍ୱଭୂଷଣ ବାବୁ ବକ୍ସିଙ୍କ ସାହସ, ବୀରତ୍ୱ, ତ୍ୟାଗ ଓ ସାଲିସ୍‌ବିହୀନ ଗୁଣ ଦ୍ୱାରା ଗଭୀର ଭାବରେ ପ୍ରଭାବିତ ।

କାରଣ, ଏହି ସବୁ ଗୁଣଗୁଡ଼ିକ, ମୁଁ ବିଶ୍ୱଭୂଷଣ ବାବୁଙ୍କ ପାଖରେ ମଧ୍ୟ ଥିବାର ଅନୁଭବ କରିଛି । ଆଜି ଏହି ପୁସ୍ତକ ଦ୍ୱାରା, ମୁଁ ଆଶା କରୁଛି, ବକ୍ସିଙ୍କ ମହାନ୍‌ ଗୁଣଗୁଡ଼ିକ ଆମ ଯୁବବର୍ଗଙ୍କ ଭିତରେ ମଧ୍ୟ ସଞ୍ଚାରିତ ହେବ ।

ସେହିପରି ‘ଏ ମାଟି କଥା କହେ’ ପୁସ୍ତକରେ ନେତାଜୀ ସୁବାଷ ଚନ୍ଦ୍ର ବୋଷ, ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ, ଗଣତନ୍ତ୍ର, ଗଣମାଧ୍ୟମ, ଓଡ଼ିଆ ଜାତିର ଅସ୍ମିତା, ବିଶ୍ୱ ଶାନ୍ତି ଓ ଶ୍ରୀଜଗନ୍ନାଥଙ୍କ ନବକଳେବର ଯାତ୍ରା ଉପରେ ଆଧାରିତ ୩୦ଟି ଗଭୀର ଚିନ୍ତନାତ୍ମକ ବିଷୟ ସାମିଲ ହୋଇଛି, ଯାହା ସମସ୍ତ ବର୍ଗର ପାଠକଙ୍କୁ ନିଶ୍ଚୟ ଆକର୍ଷିତ କରିବ।

ମୁଁ ଆଶା କରୁଛି ଏହି ପୁସ୍ତକର ଇଂରାଜୀ ଅନୁବାଦ ମଧ୍ୟ ଆଗାମୀ ଦିନରେ ଉପଲବ୍‌ଧ ହେବ । ତା’ହେଲେ ଏହି ସବୁ ବିଷୟରେ ସାରା ଦେଶର ପାଠକ ଜାଣିବାକୁ ପାଇବେ ।

ହରିଚନ୍ଦନଙ୍କର ଅନେକ ନାଟକ, ପ୍ରବନ୍ଧ ଓ ଗଳ୍ପ ସଂକଳନ ପାଠକୀୟ ମହଲରେ ବେଶ୍‌ ଆଦୃତି ଲାଭ କରିଛି ।

ତାଙ୍କ ପ୍ରେରଣାଦାୟୀ ଆତ୍ମଜୀବନୀ ‘ସଂଗ୍ରାମ ସରିନାହିଁ’, ପାଠକ ମହଲରେ ଅନେକ ପ୍ରଂଶସା ସାଉଁଟିଛି । ଏହି ଗ୍ରନ୍ଥଗୁଡ଼ିକର ଇଂରାଜୀ, ହିନ୍ଦୀ ଓ ତେଲୁଗୁ ଅନୁବାଦ ମାଧ୍ୟମରେ ସେ ସାରା ଦେଶରେ ଓଡ଼ିଆ ସାହିତ୍ୟ ଓ ଚିନ୍ତାଧାରାକୁ ପରିଚିତ କରାଇଛନ୍ତି   ।

ଏପରି ଜଣେ ଅନୁଭବୀ ମହାନ୍‌ ସାରସ୍ୱତ ସାଧକଙ୍କ ଲେଖନୀରୁ ଜନ୍ମ ନେଇଥିବା ଏହି ପୁସ୍ତକଗୁଡ଼ିକ ଛାତ୍ରଛାତ୍ରୀ, ଗବେଷକ, ବୁଦ୍ଧିଜୀବୀ ଓ ସାଧାରଣ ପାଠକ — ସମସ୍ତଙ୍କ ପାଇଁ ଏକ ଅମୂଲ୍ୟ ସମ୍ପଦ ହେବ ବୋଲି ମୋର ଦୃଢ଼ ବିଶ୍ୱାସ ବୋଲି ମୁଖ୍ୟମନ୍ତ୍ରୀ କହିଥିଲେ।

ପ୍ରଫେସର ବିଜୟାନନ୍ଦ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ଉତ୍ସବରେ ଓଡିଶା ରାଜ୍ୟପାଳ ଡ଼ଃ ହରିବାବୁ କମ୍ଭମପତି, ରାଜସ୍ବ ମନ୍ତ୍ରୀ ସୁରେଶ ପୂଝରୀ, ପୁସ୍ତକଦ୍ବୟର ରଚୟତା ବିଶ୍ୱଭୂଷଣ ହରିଚନ୍ଦନ,ସମ୍ବାଦ ଅଧକ୍ଷ ସୌମ୍ୟରଞ୍ଜନ ପଟନାୟକ ପ୍ରମୁଖ ମଞ୍ଚ ମଣ୍ଡନ କରିଥିଲେ । ପ୍ରଫେସର ଭଗବାନ ଜୟସିଂହ   ପୁସ୍ତକ ସମ୍ପର୍କିତ ସୂଚନା ଦେଇଥିଲେ।

ଭୁବନେଶ୍ୱର: ବୃତ୍ତି ଓ ପ୍ରବୃତ୍ତିରେ ଯଥାର୍ଥ ଅଂଶୀଦାର ହୋଇ ନିଜର ତଥା ଅନୁଭବର ସମନ୍ୱୟରେ ଭଲ ଗପ ଉତୁରିଥାଏ | ସଫଳ ଗଳ୍ପ ରଚନା ନିମନ୍ତେ ଗବେଷଣା କରିବା ମଧ୍ୟ ଜରୁରୀ ବୋଲି ବିଶିଷ୍ଟ କଥାଶିଳ୍ପୀ ପ୍ରଦୋଷ ମିଶ୍ର ଉଲ୍ଲେଖ କରିଛନ୍ତି |

ଆଜି ସନ୍ଧ୍ୟାରେ ଭୁବନେଶ୍ବର ସାହିତ୍ୟ ସମାଜ ଟ୍ରଷ୍ଟ ଆନୁକୂଲ୍ୟରେ ସ୍ଥାନୀୟ ଜୟଦେବ ଭବନରେ ଆୟୋଜିତ “ସାହିତ୍ୟ ମାସିକୀ ” କାର୍ଯ୍ୟକ୍ରମରେ ଅତିଥି ଭାବରେ ଯୋଗଦେଇ ଶ୍ରୀ ମିଶ୍ର କହିଲେ ଯେ ପରିବେଶରୁ ଚରିତ୍ରମାନେ ଆସନ୍ତି ଓ ସତ୍ୟ ସହିତ କଳ୍ପନାର ମିଶ୍ରଣରେ ଭଲ ଗପ ସୃଷ୍ଟି ହୋଇପାରେ | ସେ ତାଙ୍କ ସୃଜନ ଯାତ୍ରାର ବିବରଣୀ ପ୍ରଦାନ କରିଥିଲେ |

ଅନୁଷ୍ଠାନର ଉପସଭାପତି ମିନତି ଦାଶ (ମାନୀ)ଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ଶ୍ରୀ ମିଶ୍ରଙ୍କ ସହ କଥାଶିଳ୍ପୀ ମୌସୁମୀ ଦାସ କଥାବାର୍ତ୍ତା କରିଥିଲାବେଳେ ସର୍ବଶ୍ରୀ ନନ୍ଦ କିଶୋର ବିଶ୍ୱାଳ, ଶ୍ୟାମାକିଙ୍କର ମହାନ୍ତି ଓ ସତ୍ୟରଞ୍ଜନ ପ୍ରହରାଜ ବିଭିନ୍ନ ପ୍ରଶ୍ନ ପଚାରିରଥିଲେ | ଯୁବ କଵି ରଶ୍ମିତା ବେହେରା “ଏ ମାସର କଵି ” ହିସାବରେ ଉପସ୍ଥିତ ରହି ସ୍ୱରଚିତ ଲେଖା ପାଠ କରିଥିଲେ |

ପରେ ଅଧ୍ୟାପିକା ଡ଼. ସଂଯୁକ୍ତା ପରିଡାଙ୍କ ସଂଯୋଜନାରେ ଅନୁଷ୍ଠିତ କବିତା ପାଠୋତ୍ସବରେ ଉଷାରାଣୀ ଆଚାର୍ଯ୍ୟ, ଗୋଲକ ରାଉତ,ମନମୋହନ ମିଶ୍ର, ନିରୁପମା ରଥ, ବାସନ୍ତୀ ତ୍ରିପାଠୀ, ପ୍ରକାଶ ବେହେରା, ପିତାମ୍ବର ଭୋଇ, ସଞ୍ଜୁଲତା ମହାନ୍ତି ପଟ୍ଟନାୟକ, ରଜନୀକାନ୍ତ ପଟ୍ଟନାୟକ, ତପନ ରଥ, ମିହିରକାନ୍ତି ଦାଶ, ମହେନ୍ଦ୍ର କୁମାର ମଲ୍ଲିକ, ପ୍ରବୀଣା ପରିଡା, ଅଶୋକ ସିଂହ, ପ୍ରଦ୍ୟୁମ୍ନ ପଟ୍ଟନାୟକ, ରଶ୍ମି ଦାସ, ସଂତାପ ଜେନା, ଧ୍ରୁବଚରଣ ସେଠୀ, ସୁଶାନ୍ତ ଷଡ଼ଙ୍ଗୀ, ଜୀବନକୃଷ୍ଣ ମିଶ୍ର, ଶୀତଳ ମିଶ୍ର, ପବିତ୍ର ମୋହନ ବାରିକ, ଅନୁସୂୟା ବାରିକ, ସ୍ୱର୍ଣ୍ଣଲତା ମହାପାତ୍ର, କବିତା ମିଶ୍ର, କ୍ଷେତ୍ରମୋହନ ଦାସ, ଅରୁଣା କର ଓ ପ୍ରିୟରଞ୍ଜନ ସାହୁ ପ୍ରମୁଖ ନିଜ ଲେଖା ଆବୃତ୍ତି କରିଥିଲେ | ଶେଷରେ ଅନୁଷ୍ଠାନର କାର୍ଯ୍ୟକାରୀ ସଭାପତି ରକ୍ଷକ ନାୟକ ଧନ୍ୟବାଦ ଅର୍ପଣ କରିଥିଲେ |

ଭୁବନେଶ୍ୱର: ସାଧାରଣ ମଣିଷମାନଙ୍କୁ ମୋ ଲେଖାରେ ଚରିତ୍ର କରେ ଓ ସତ୍ୟର ପରଦା ଉଠାଇବାକୁ ଚେଷ୍ଟା କରେ ବୋଲି କଥାଶିଳ୍ପୀ ଡ଼. କବିତା ବାରିକ ଉଲ୍ଲେଖ କରିଛନ୍ତି | ଆଜି ସନ୍ଧ୍ୟାରେ ସ୍ଥାନୀୟ ଜୟଦେବ ଭବନରେ ଭୁବନେଶ୍ୱର ସାହିତ୍ୟ ସମାଜ ଟ୍ରଷ୍ଟ ଆନୁକୂଲ୍ୟରେ ଅନୁଷ୍ଠିତ

‘ସାହିତ୍ୟ ମାସିକୀ ‘ କାର୍ଯ୍ୟକ୍ରମରେ ଯୋଗଦେଇ ‘ମୋ ଜୀବନ, ମୋ ସୃଜନ’ ଶୀର୍ଷକ ବକ୍ତବ୍ୟ ରଖି କହିଲେ ଯେ ଦୁଃଖ ଓ ଅସହାୟତା

ସେ ତାଙ୍କ ଲେଖାରେ ଉପସ୍ଥାପିତ କରିଛନ୍ତି | ସେ ମୃତ୍ୟୁକୁ ନିକଟରୁ ଅନୁଭବ କରିଛନ୍ତି ବୋଲି ଦର୍ଶାଇ ତାଙ୍କ ସାହିତ୍ୟ ଯାତ୍ରା ବାବଦରେ ବିଶଦ ବିବରଣୀ ଦେଇଥିଲେ |

କଥାକାର ପ୍ରଦ୍ୟୁମ୍ନ ପଟ୍ଟନାୟକଙ୍କ ଅଧକ୍ଷତାରେ ଅନୁଷ୍ଠିତ ସଭାରେ ପ୍ରଥମେ ଅନୁଷ୍ଠାନର ସଭାପତି ସୂର୍ଯ୍ୟ ମିଶ୍ର ସ୍ୱାଗତ ଭାଷଣ ଦେଇ ଅନୁଷ୍ଠାନର କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିବାବେଳେ “ଏ ମାସର କଵି ” ହିସାବରେ ନିହାର ରଞ୍ଜନ ପରିଡା ଯୋଗ ଦେଇ ସ୍ୱରଚିତ କବିତା ପାଠ କରିଥିଲେ | ଡ଼. ଅଶୋକ ସିଂହ କାର୍ଯ୍ୟକ୍ରମ ପରିଚାଳନା କରିଥୁଲେ|

ପରେ ଆୟୋଜିତ କବିତା ପଠୋତ୍ସବରେ ଅଧ୍ୟାପିକା ମାନିନୀ ଜେନା ଓ କ୍ଷଣପ୍ରଭା ମହାନ୍ତି ସଂଯୋଜନା କରିଥିବାବେଳେ କୁମୁଦିନୀ ଜୀ, ଜୟ ନାରାୟଣ ନନ୍ଦ, ମିନତି ମିଶ୍ର, ଶ୍ୟାମା କିଙ୍କର ମହାନ୍ତି, ମିହିରକାନ୍ତି ଦାଶ, କଣ୍ଡୁରୀ ନାୟକ, ପବିତ୍ର ବାରିକ, ଲଷ୍ମୀଧର ଦାଶ, ପ୍ରିୟରଞ୍ଜନ ସାହୁ, ଅକ୍ଷୟ ସାହୁ,ପ୍ରମୋଦ ପ୍ରଧାନ,

ଦିଲ୍ଲୀପ ନାୟକ, ଶର୍ମିଷ୍ଠା ମହାପାତ୍ର, ବାସନ୍ତୀ ତ୍ରିପଠୀ, ବିରଞ୍ଚି ଶତପଥୀ, ସୁଶାନ୍ତ ଷଡ଼ଙ୍ଗୀ, ନିରୁପମା ରଥ, ଇତିଶ୍ରୀ ପତି, କଳ୍ପନା ମହାରଣା, ନବୀନ ଦାସ, ଅଲେଖ ରାଉତ, ଅଶୋକ ବେହେରା, ନମିତା ପାଇକରାୟ, ମନମୋହନ ମିଶ୍ର, ସଞ୍ଜୁଲତା ମହାନ୍ତି, ଅଳକା ରାୟ ଓ ଶୈଳେନ୍ଦ୍ର ଜେନା ପ୍ରମୁଖ ଲେଖା ପାଠ କରିଥିଲେ |

ଆରମ୍ଭରେ ବିଶିଷ୍ଟ ପ୍ରାବନ୍ଧିକ ଓ ସମ୍ପାଦକ ପ୍ରଫେସର ରବି ଶଙ୍କର ମିଶ୍ରଙ୍କ ବିୟୋଗରେ ନିରବ ପ୍ରାର୍ଥନା କରାଯାଇଥିଲା | ଶେଷରେ ଉପସଭାପତି ବିଭୁତି ପାଣିଗ୍ରାହୀ ଧନ୍ୟବାଦ ଅର୍ପଣ କରିଥିଲେ |