ସମ୍ବାଦ ଖବର କାଗଜର ଗୁମର କଥା କହିଲେ ଡି. ଆର. ପଟ୍ଟନାୟକ “ଡ଼ିଅର ଡିଆର” ଜୀବନୀ ପୁସ୍ତକରେ

ଭୁବନେଶ୍ୱର : ସମ୍ବାଦ ଖବର କାଗଜ ଉପରେ ବିଜେଡି ସରକାରର ଚଢ଼ାଉର ଗୁମର କଥା ଖୋଲିଛନ୍ତି  ଡି ଆର ପଟ୍ଟନାୟକ l

ଦେଶର ପ୍ରମୁଖ ଖଣି ମାଲିକ ଡି ଆର ପଟ୍ଟନାୟକଙ୍କ ଜୀବନୀ ଉପରେ ଲେଖା ଯାଇଥିବା ସ୍ୱୀକୃତିପ୍ରାପ୍ତ ପୁସ୍ତକ “ଡ଼ିଅର ଡିଆର” ରେ ଲେଖକ ଡକ୍ଟର ସଞ୍ଜୟ ହାତୀ ‘ବିରାଡ଼ି କପାଳକୁ ଶିକା ଛିଡ଼ିଲା’ ପରିଛେଦ ରେ 2024 ସାଧାରଣ ନିର୍ବାଚନ ପୂର୍ବରୁ ସମ୍ବାଦ ଉପରେ ବିଜେଡି ସରକାରର ଅର୍ଥନୈତିକ ଅପରାଧ ଶାଖାର ଚଢ଼ାଉ ଓ ଏହାର ପରବର୍ତୀ ଘଟଣାର ଗୋପନ କଥା ଲେଖିଛନ୍ତି l

ନିର୍ବାଚନ ପୂର୍ବରୁ ସମ୍ବାଦର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ଖବର କାଗଜର ପ୍ରଥମ ପୃଷ୍ଠାରେ ନିଜ ଦସ୍ତଖତ ସମ୍ବଳିତ ଏକ ଆଲେଖ୍ୟ ରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସଚିବ ଭି କେ ପାଣ୍ଡିଆନଙ୍କ ସମ୍ପର୍କରେ ଛାପିଥିଲେ l

ଡି ଆର ପଟ୍ଟନାୟକ କହିଛନ୍ତି, “ବିଜେଡି ସରକାରଙ୍କ ବିରୋଧରେ ତାଙ୍କର ସ୍ୱର ଉତ୍ତୋଳନ ତାଙ୍କୁ ବେଶୀ କ୍ଷତିଗ୍ରସ୍ତ କରାଇଥିଲା l ସରକାରୀ କଳ ତାର ସମସ୍ତ ବଳ ପ୍ରୟୋଗ କଲା ସୌମ୍ୟରଂଜନଙ୍କୁ ଚୁପ କରାଇବା ଲାଗି l ସୌମ୍ୟରଞ୍ଜନ ଇଷ୍ଟ ର୍ଣ୍ଣ ମିଡ଼ିଆର ଅଧକ୍ଷ ପଦ ଛାଡିବା ପରେ ମଧ୍ୟ ଏ ବିବାଦ ଥମିଲା ନାହିଁ l ପାଣ୍ଡିଆନ ମହାଶୟ ସିଧା ସଳଖ ସର୍ତ୍ତ ରଖିଲେ ସମ୍ବାଦକୁ ଅନ୍ୟ କାହାକୁ ହସ୍ତାନ୍ତର କରିଲେ ହିଁ ରକ୍ଷା l ନଚେତ ପରିମାଣ ଭୋଗିବାକୁ ପ୍ରସ୍ତୁତ ରୁହ l ଏପରିକି ସରକାରୀ ଦଳ ପୁଞ୍ଜି ଲଗାଣକାରୀଙ୍କୁ ମଧ୍ୟ ଯୋଗାଡ଼ କରି ସାରିଥିଲେ l ତେବେ ଆଉ ଗୋଟିଏ ରିହାତି ତା ମଧ୍ୟରେ ଥିଲା l ଯଦି ଡି.ଆର ତାହାର ଏକାବନ ପ୍ରତିଶତ ଭାଗିଦାରୀ ହୁଅନ୍ତି, ତେବେ ସରକାରୀ କଳର ସାହାଯ୍ୟ ରହିବ l”

ଡି.ଆର. ତାଙ୍କୁ ପ୍ରସ୍ତାବ ଦେଲେ ଗିଫ୍ଟ ହିସାବରେ ଖାଲି ଘୋଷଣା କରି ହସ୍ତାନ୍ତର କରିଦେବାକୁ l ତାହା ହେଲେ ପରେ ପୁଣି ଫେରାଇବାକୁ ସହଜ ହେବ l

“ମାତ୍ର ସୌମ୍ୟ ବାବୁଙ୍କ ସୁଯୋଗ୍ୟ ପୁତ୍ରସମ ବନ୍ଧୁ ଏହାକୁ ଅଲଗା ବାଟରେ ନେବାକୁ ଚାହୁଁଥିଲେ l ସେତେବେଳେ ସମ୍ବାଦ ଏବଂ ଇଷ୍ଟର୍ଣ୍ଣ ମିଡ଼ିଆର ଲିମିଟେଡ଼ର ଆର୍ଥିକ ଦାୟ ଥିଲା ଖୁବ ବେଶୀ l ତେଣୁ ସେମାନେ ଚାହିଁଲେ ବିଧିବଦ୍ଧ ଭାବେ ନିୟମ ଅନୁଯାୟୀ ଆବଶ୍ୟକତାରୁ ଅଧିକ ମୂଲ୍ୟ ବିନିମୟରେ ଡି. ଆର. ଙ୍କୁ ଏହାର ଦାୟିତ୍ୱ ହସ୍ତାନ୍ତର କରିବାକୁ l ଏଥିପାଇଁ ଡି. ଆର ଦେଢ଼ ଶହ କୋଟି ଦେଲେ କାରଣ ସେମାନେ କହିଲେ ଏକାବନ ପ୍ରତିଶତର ଟଙ୍କା ଦରକାର, ନହେଲେ ଅଧକ୍ଷ କାର୍ଯ୍ୟଭାର ହସ୍ତାନ୍ତର ହୋଇପାରିବ ନାହିଁ l ଇଷ୍ଟର୍ଣ୍ଣ ମିଡ଼ିଆର ଦାୟ ଭାର ଥିଲା ପ୍ରାୟ ଶହେ କୋଟି l ଟଙ୍କା ଦିଆଗଲା ଇଷ୍ଟର୍ଣ୍ଣ ମିଡ଼ିଆ ଲିମିଟେଡ଼ର ଉନ୍ନତି ନିମନ୍ତେ, ମାତ୍ର ଅଧିକାଂଶ ଅର୍ଥ ଲାଗିଲା ସେମାନଙ୍କର ବ୍ୟକ୍ତିଗତ ଇଚ୍ଛାପୁର୍ତ୍ତିରେ l

Xxx

“ବିରାଡ଼ି କପାଳକୁ ଶିକା ଛିଡ଼ିଲା ପରି ଓଡ଼ିଶାରେ ବିଜେଡି ସରକାର ହାରିଗଲା ନିର୍ବାଚନରେ l ବିଜେପି କ୍ଷମତାକୁ ଆସିଲା l ଏହା ସୌମ୍ୟରଞ୍ଜନଙ୍କ ନିମନ୍ତେ ଥିଲା ସୁନ୍ଦର ସୁଯୋଗ l ସେ କଣ କରିଥାନ୍ତେ, ସେକଥା ଭିନ୍ନ, ମାତ୍ର ସୁଯୋଗ୍ୟ ପୁତ୍ରସମ ବନ୍ଧୁଙ୍କ ପରାମର୍ଶରେ ଡି. ଆର. ଙ୍କୁ ବାଧ୍ୟ କରାଗଲା ପଦବୀ ଛାଡିବା ଲାଗି l ଡି. ଆର. ଅଧକ୍ଷ ପଦବୀ ଛାଡିଲେ କିନ୍ତୁ ସର୍ତ୍ତ ରହିଲା ତାଙ୍କର ଦେଇଥିବା ଅର୍ଥ ଫେରସ୍ତ ନକରିବାଯାଏଁ ସେ କାଗଜପତ୍ର ହସ୍ତାନ୍ତର କରିବେ ନାହିଁ l ଏଭଳି ଅବସ୍ଥାରେ ବର୍ତମାନ ଇଷ୍ଟର୍ଣ୍ଣ ମିଡ଼ିଆ ଲିମିଟେଡ଼ l”

ଡି. ଆର. କ୍ଷୋଭର ସହ କହିଛନ୍ତି, “ସମ୍ବାଦକୁ ଏକ ନମ୍ବର କରିବାରେ ତିନିଜଣଙ୍କ ଅବଦାନ ରହିଛି l ଆଜି ସୌମ୍ୟରଞ୍ଜନ ସେ କଥା ଭୁଲି ଯାଇଛନ୍ତି ବା ଜାଣି ମଧ୍ୟ କିଛି କରିପାରୁନାହାନ୍ତି l ନୂତନ ପିଢ଼ିର ପିଲାମାନେ କେବଳ ସ୍ୱାର୍ଥ ଦେଖନ୍ତି ଆଉ ଟଙ୍କାକୁ ଚିହ୍ନନ୍ତି l ସେଥିରେ ସମ୍ପର୍କ ବା ଭାପ୍ରବଣତାର କିଛି ମୂଲ୍ୟ ନାହିଁ l ସେମିତି ହୁଏତ ହୋଇଥିବ l ସୌମ୍ୟ ସବୁ ଜାଣି ମଧ୍ୟ ନିରବ ରହିବାକୁ ବାଧ୍ୟ ହେଇଥିବ ବା ସେମାନଙ୍କ କଥାରେ ଚାଲିବାକୁ ହେଉଥିବ ତାଙ୍କୁ l”