ଭୁବନେଶ୍ୱର ୨୬/୧୨ : ବିଜେଡ଼ି ବୁଧବାର ତା’ର ୨୧ତମ ପ୍ରତିଷ୍ଠା ଦିବସ ପାଳନ କରୁଥିବା ବେଳେ ବିଜେପି ପକ୍ଷରୁ ସମାନ୍ତରାଳ ସମାବେଶ କରାଯାଇଛି । କଂଗ୍ରେସ ମଧ୍ୟ ଆଜି କଳା ଦିବସ ପାଳନ କରିଛି । ବିଭିନ୍ନ ପ୍ରଶ୍ନକୁ ନେଇ ‘ଜବାବ ମାଗୁଛି ଓଡ଼ିଶା’ ମାଧ୍ୟମରେ ଉଭୟ ବିଜେଡ଼ି ଓ ବିଜେପି ପରସ୍ପରକୁ ଦୋଷାରୋପ କରି ନିଜର ପାରଙ୍ଗମତା ପ୍ରମାଣ ପାଇଁ ଉଦ୍ୟମ କରିଛନ୍ତି ।
ଭୁବନେଶ୍ୱରସ୍ଥିତ ବିଜେଡ଼ି କାର୍ଯ୍ୟାଳୟରେ ଅନୁଷ୍ଠିତ ବିଜେଡ଼ି ପ୍ରତିଷ୍ଠା ଦିବସରେ ଉଦବୋଧନ ଦେଇ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରୀୟ ଅବହେଳା ପ୍ରସଙ୍ଗ ଉଠାଇ ବିଜେପିକୁ ତୀବ୍ର ସମାଲୋଚନା କରିଛନ୍ତି । ସେ ବିଭିନ୍ନ ପ୍ରସଙ୍ଗରେ କେନ୍ଦ୍ରକୁ ଜବାବ ମାଗିଛନ୍ତି । ଶ୍ରୀ ପଟ୍ଟନାୟକ କହିଛନ୍ତି ଯେ, କେନ୍ଦ୍ରସରକାର ଟେଲିକମ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛନ୍ତି ବୋଲି ପ୍ରଚାର କରିଚାଲିଛନ୍ତି । କିନ୍ତୁ ଏହା ଅସତ୍ୟ । ଓଡ଼ିଶାର ଗାଁ ଗହଳିରେ ଟେଲିକମ୍ ସେବା ଠିକ୍ ଭାବେ ପହଂଚି ପାରିନାହିଁ । ମୋବାଇଲ ନେଟୱାର୍କ ପାଇଁ ଲୋକମାନଙ୍କୁ ଛାତ ବା ଗଛ ଉପରକୁ ଚଢ଼ିବାକୁ ପଡ଼ୁଛି । ରେଳବାଇ କ୍ଷେତ୍ରରେ ମଧ୍ୟ କେନ୍ଦ୍ର ସରକାର ଓଡ଼ିଶାକୁ ଉପେକ୍ଷା କରିଚାଲିଛନ୍ତି । ଓଡ଼ିଶାରୁ ରେଳବାଇ ବର୍ଷକୁ ୨୦ ହଜାର କୋଟି ଟଙ୍କା ନେଉଥିବାବେଳେ ମାତ୍ର ୨ ହଜାର କୋଟି ଟଙ୍କାର ସେବା ଯୋଗାଉଛି । ଏମସିଏଲରୁ କେନ୍ଦ୍ର ସରକାର ବର୍ଷକୁ କୋଟି କୋଟି ଟଙ୍କା ନେଉଯାଉଥିବା ବେଳେ ପ୍ରତିବଦଳରେ ପ୍ରଦୂଷଣ ହିଁ ଦେଉଛନ୍ତି । ଖୋର୍ଦ୍ଧା-ବଲାଙ୍ଗିର ରେଳଲାଇନ ପାଇଁ ରାଜ୍ୟ ସରକାର ମାଗଣାରେ ଜମି ଓ ପ୍ରକଳ୍ପ ଖର୍ଚ୍ଚର ଅଧା ଦେଉଥିବା ବେଳେ ଏହି କାମ ସତେ ଅବା ଇତିହାସ ଗର୍ଭରେ ଲୀନ ହୋଇଯିବାକୁ ବସିଛି । କାରଣ ବର୍ଷ ବର୍ଷ ଧରି ଖୋର୍ଦ୍ଧା-ବଲାଙ୍ଗିର ରେଳଲାଇନ ଅଧାପନ୍ତରିଆ ଭାବେ ପଡ଼ି ରହିଛି । ପେଟ୍ରୋଲର ଦର ବୃଦ୍ଧି ରୋକିବାରେ କେନ୍ଦ୍ର ସରକାର ବିଫଳ ହୋଇଛନ୍ତି ।
କେବଳ ଏତିକି ନୁହେଁ, କେନ୍ଦ୍ର ଅନୁସୂଚିତ ଜାତି ଓ ଜନଜାତି ଛାତ୍ରଛାତ୍ରୀଙ୍କ ଷ୍ଟାଇପେଣ୍ଡ ଦୁଇବର୍ଷ ହେବ ଦେଇନାହାନ୍ତି ଏବଂ ଆଦିବାସୀମାନଙ୍କ ପାଇଁ ଉଦ୍ଦିଷ୍ଟ ଅନୁଦାନକୁ ମଧ୍ୟ ବନ୍ଦ କରିଦେଇଛନ୍ତି । ଖଣି ବାବଦରେ କେନ୍ଦ୍ର ସରକାର ୭୦ ହଜାର କୋଟି ଟଙ୍କା ନେଇଥିବାବେଳେ ୩ ବର୍ଷରେ ଦେଇଛନ୍ତି ମାତ୍ର ୩୭୦ କୋଟି ଟଙ୍କା । ଚାଷୀମାନଙ୍କ ସମସ୍ୟା ନିରାକରଣ କ୍ଷେତ୍ରରେ ମଧ୍ୟ କେନ୍ଦ୍ର ସରକାର ବିଫଳ ହୋଇଛନ୍ତି । ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ଦିଆଯାଉନାହିଁ କି ଫସଲର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି କରାଯାଉନାହିଁ । ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ଦରକାର ନାହିଁ କି ସ୍ୱତନ୍ତ୍ର ସହାୟତା ମଧ୍ୟ ଦରକାର ନାହିଁ । ରାଜ୍ୟକୁ ଆର୍ଥିକ ସ୍ୱାଧୀନତା ପ୍ରଦାନ ପାଇଁ ଦାବି କରି ମୁଖ୍ୟମନ୍ତ୍ରୀ କହିଛନ୍ତି ଯେ, ଏହା ହେଲେ ଓଡ଼ିଶା ନିଜ ଆୟରେ ନିଜେ ସୁରୁଖୁରୁରେ ଚଳିପାରିବ । ଓଡ଼ିଶାର ହକ ପାଇଁ ରାଜ୍ୟ ସରକାର କେନ୍ଦ୍ର ବିରୁଦ୍ଧରେ ଆନ୍ଦୋଳନ ଜାରି ରଖିବେ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ।
ଅପରପକ୍ଷରେ ଏହାର ଜବାବ ଦେଇ ବିଜେପି ଏସବୁ ଅଭିଯୋଗକୁ ଦୃଢ଼ ଭାବେ ଖଣ୍ଡନ କରିଛି । ବିଜେଡ଼ିର ପ୍ରତିଷ୍ଠା ଦିବସରେ ଭୁବନେଶ୍ୱର ବରମୁଣ୍ଡା ପଡ଼ିଆରେ ଏକ ସମାନ୍ତରାଳ ସମାବେଶରେ ବିଜେପି ‘ଓଡ଼ିଶା ମାଗୁଛି ଜବାବ’ ଅଭିଯାନ ଆରମ୍ଭ କରିଛି । ଏହି ଅଭିଯାନରେ ବିଜେପିର ରଥ ରାଜ୍ୟର ୧୪୭ଟି ବିଧାନସଭା ନିର୍ବାଚନ ମଣ୍ଡଳୀ ପରିକ୍ରମା କରି ରାଜ୍ୟ ସରକାରଙ୍କ ବିଫଳତା ସମ୍ପର୍କରେ ଲୋକଙ୍କୁ ସଚେତନ କରାଇବ । ଏହି ସମାବେଶରେ ଉଦ୍ବୋଧନ ଦେଇ କେନ୍ଦ୍ର ପେଟ୍ରୋଲିୟ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟମନ୍ତ୍ରୀ ଉଠାଇଥିବା ପ୍ରଶ୍ନର ଜବାବ ଦେଇଛନ୍ତି । ସେ କହିଛନ୍ତି ଯେ, ଓଡ଼ିଶାରେ ରେଳ ଲାଇନର ସମ୍ପ୍ରସାରଣ ନେଇ ବିଜେଡ଼ି ଯେଉଁ ପ୍ରଶ୍ନ ଉଠାଇଛି ତାହା ଠିକ୍ କିନ୍ତୁ ରାଜ୍ୟ ସରକାରଙ୍କ ଅପାରଗତା ଯୋଗୁ ହିଁ ରେଳ ଲାଇନ ସମ୍ପ୍ରସାରଣ କାର୍ଯ୍ୟ ଠିକ୍ ଭାବେ ଆଗେଇ ପାରୁନାହିଁ । ଖୋର୍ଦ୍ଧା-ବଲାଙ୍ଗିର ରେଳଲାଇନ ପାଇଁ ସରକାର କେତେ ଜାଗା ଯୋଗାଇଛନ୍ତି ତାହା ଅବିଳମ୍ବେ ସ୍ପଷ୍ଟ କରନ୍ତୁ । ଏଥିପାଇଁ ସୁବର୍ଣ୍ଣପୁର ଓ ବୋ÷ଦ୍ଧ ଜିଲ୍ଲାରେ ରାଜ୍ୟ ସରକାର ଇଂଚେ ବି ଜାଗା ଦେଇନାହାନ୍ତି ବୋଲି ସେ ଅଭିଯୋଗ କରିଛନ୍ତି । ସେ କହିଛନ୍ତି ଯେ, କେନ୍ଦ୍ର ସରକାର ଟିକସ କମାଇବା ଯୋଗୁ ପେଟ୍ରୋଲ ଓ ଡିଜେଲ ଦର ୨ ମାସରେ ପ୍ରାୟ ୨୦ ଟଙ୍କା କମିଲାଣି । ରାଜ୍ୟ ସରକାର ଏପର୍ଯ୍ୟନ୍ତ କାହିଁକି ଟିକସ କମାଇ ନାହାନ୍ତି ବୋଲି ଶ୍ରୀ ପ୍ରଧାନ ପାଲଟା ପ୍ରଶ୍ନ କରିଛନ୍ତି । ରାଜ୍ୟ ସରକାର ମହିଳାଙ୍କୁ ସୁରକ୍ଷା ଯୋଗାଇ ଦେଇପାରୁନାହାନ୍ତି ବୋଲି ଦର୍ଶାଇ ଶ୍ରୀ ପ୍ରଧାନ କହିଛନ୍ତି ଯେ, କୁନ୍ଦୁଲୀ-ଗୁମୁଡୁମାହାର ମହିଳା ଓ ଶିଶୁମାନଙ୍କ ଆଖିର ଲୁହ ଶୁଖୁନାହିଁ । ରାଜ୍ୟ ସରକାର ମହିଳାଙ୍କ ପାଇଁ ୩୩% ସ୍ଥାନ ସଂରକ୍ଷଣ ଦାବି କରୁଛନ୍ତି । ହେଲେ ନବୀନଙ୍କ ମନ୍ତ୍ରୀ ମଣ୍ଡଳରେ କେତେଜଣ ମହିଳା ସଦସ୍ୟ ଅଛନ୍ତି ବିଜେଡ଼ି ତା’ର ହିସାବ ଦେବ କି ?
