ଭୁବନେଶ୍ୱର ୨୯/୧୧ : ପ୍ରବଳ ଉତ୍ସାହ ଓ ଉଦ୍ଦୀପନା ମଧ୍ୟରେ ଏବେ ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ରେ ଆରମ୍ଭ ହୋଇଚି ବିଶ୍ୱକପ୍ ହକି । ଗତ ୨୭ ତାରିଖରେ ଏକ ବର୍ଣ୍ଣାଢ଼୍ୟ ପରିବେଶରେ ଅନୁଷ୍ଠିତ ହୋଇଥିଲା ମନୋରମ ଉଦ୍ଘାଟନୀ ଉତ୍ସବ । ଆତସବାଜିର ଚମକ, ଆଲୋକର ବର୍ଣ୍ଣାଳୀ ସାଙ୍ଗକୁ ବଲିଉଡ୍ ତାରକା ମାଧୁରୀ ଦୀକ୍ଷିତ୍ ଏବଂ ଓସ୍କାର ବିଜେତା ବିଶ୍ୱ ବିଖ୍ୟାତ ସଙ୍ଗୀତଜ୍ଞ ଏଆର୍ ରହମାନଙ୍କ ସୁଲଳିତ ନୃତ୍ୟ ସଙ୍ଗୀତରେ ଦର୍ଶକ ହୋଇଥିଲେ ମତୁଆଲା । କେବଳ ରାଜ୍ୟ ନୁହେଁ, ସମଗ୍ର ଭାରତବର୍ଷ ଓ ବିଶ୍ୱର ୧୯୩ଟି ଦେଶର ଲୋକ ଟିଭି ପରଦାରେ ଏହି ସମାରୋହର ଚମକ ଦେଖି ହୋଇଛି ଆତ୍ମବିସ୍ମୃତ । ଏକଦା ଅଖ୍ୟାତ ଥିବା ଭୁବନେଶ୍ୱର ବା ଓଡ଼ିଶା ରାତାରାତି ହୋଇଛି ବିଶ୍ୱବିଖ୍ୟାତ । ବିଶ୍ୱ ମାନଚିତ୍ରରେ ଓଡ଼ିଶା ପାଇଛି ଏକ ସ୍ୱତନ୍ତ୍ର ମାନ୍ୟତା, ବିଶେଷ ପରିଚୟ । ଓଡ଼ିଶା ମଧ୍ୟ ବିଶ୍ୱ କ୍ରୀଡାର ଏକ ପ୍ରମୁଖ କେନ୍ଦ୍ରର ମାନ୍ୟତା ଲାଭ କରିଛି ।
ଅନ୍ତର୍ଜାତୀୟ ହକି ଫେଡେରେସନର ସଭାପତି ନରେନ୍ଦ୍ର ବାତ୍ରାଙ୍କ ମନ୍ତବ୍ୟ ଏହାର ସତ୍ୟତା ପ୍ରମାଣ କରିଛି । ଉଦ୍ଘାଟନୀ ଉତ୍ସବରେ ସେ କହିଥିଲେ ଯେ, କଳିଙ୍ଗ ଷ୍ଟାଡିୟମ୍ ହେଉଛି ବିଶ୍ୱର ୩ଟି ଶ୍ରେଷ୍ଠ ହକି ଷ୍ଟାଡିୟମ୍ ମଧ୍ୟରେ ଅନ୍ୟତମ । ଏହା ପ୍ରତ୍ୟେକ ଓଡ଼ିଆ, ଓଡ଼ିଶାବାସୀ ଓ ଓଡ଼ିଶାର ଗର୍ବ-ଗୋ÷ରବକୁ ନଭଶ୍ଚୁମ୍ବୀ କରିଛି । ବିଶ୍ୱ ଇତିହାସରେ ଓଡ଼ିଶା ଯୋଡ଼ିଛି ଏକ ସ୍ୱର୍ଣ୍ଣିମ ଅଧ୍ୟାୟ । ଏଭଳି ସଫଳତା ପଛରେ ଯାହାଙ୍କ ସବୁଠୁ ବଡ଼ ଅବଦାନ ରହିଛି ସେ ଅନ୍ୟ କେହି ନୁହଁନ୍ତି, ସେ ହେଉଛନ୍ତି ଦୀର୍ଘ ବର୍ଷ ଧରି ଶାସନରେ ରହିଥିବା ପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜଣେ ସେଚ୍ଚା କ୍ରୀଡାପ୍ରେମୀ ଓ ହକିର ପ୍ରୋତ୍ସାହନକାରୀ ଭାବେ ସେ ଏବେ ବିଶ୍ୱର ଏକ ଚର୍ଚ୍ଚିତ ବ୍ୟକ୍ତିତ୍ୱ । ତାଙ୍କରି ଆଗ୍ରହ ଓ ଆନ୍ତରିକତା ଯୋଗୁଁ ହିଁ ଓଡ଼ିଶାର ହକିକୁ ମିଳିଛି ଆନ୍ତର୍ଜାତିକ ସ୍ୱୀକୃତି । ଓଡ଼ିଶା ଏବେ ଏକ ବ୍ରାଣ୍ଡ ପାଲଟି ଯାଇଛି ।
ଅବଶ୍ୟ ସାରା ବିଶ୍ୱର ବିଶେଷ କରି ହକି ପ୍ରେମୀଙ୍କ ହୃତ୍ସ୍ପନ୍ଦନ ବଢ଼ାଇଥିବା ଓ ଓଡ଼ିଶାର ହକି ପ୍ରତିଭାଙ୍କ ପାଇଁ ଆନ୍ତର୍ଜାତିକ ପରିଚିତି ଦେଇଥିବା ଏହି ବିଶ୍ୱକପ୍ ଆୟୋଜନ କ୍ଷେତ୍ରରେ ଅନ୍ୟ କେତେକ ବ୍ୟକ୍ତି ବିଶେଷ କରି ପ୍ରଶାସନିକ କର୍ମକର୍ତା ଓ ପୋଲିସ ଅଧିକାରୀଙ୍କ ଅବଦାନ ନିଶ୍ଚିତ ଭାବେ ଅବିସ୍ମରଣୀୟ ହୋଇ ରହିବ । ସେମାନେ ହେଉଛନ୍ତି ରାଜ୍ୟର ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ, ଉନ୍ନୟନ କମିଶନର ଆର୍ ବାଲ୍କ୍ରିଷ୍ଣନ୍, କ୍ରୀଡା ସଚିବ ବିଶାଲ ଦେବ, କ୍ରୀଡା ନିର୍ଦ୍ଦେଶକ ଭିନୀଲ କ୍ରିଷ୍ଣନ, ପୋଲିସ ମହାନିର୍ଦ୍ଦେଶକ ଡ. ରାଜେନ୍ଦ୍ର ଶର୍ମା, ଭୁବନେଶ୍ୱର-କଟକ କମିଶନର ସତ୍ୟଜିତ୍ ମହାନ୍ତି ଓ ଡିସିପି ଅନୁପ୍ ସାହୁ । ଏହି ଅଧିକାରୀମାନଙ୍କ ସହ ଅନ୍ୟ କେତେକ ସଂଗଠନ ଯେଭଳି ସୁଚାରୁ ଭାବେ ବିଶ୍ୱକପ୍ ହକି ଆୟୋଜନ କାର୍ଯ୍ୟ ଚଳାଇଛନ୍ତି, ତାହା ଅତ୍ୟନ୍ତ ପ୍ରଶଂସନୀୟ । ଏହା ପରବର୍ତୀ ପିଢ଼ିକୁ କ୍ରୀଡା ପରିଚାଳନା କ୍ଷେତ୍ରରେ ନିଶ୍ଚିତ ଭାବେ ଦିଗ୍ଦର୍ଶନ ଯୋଗାଇ ଚାଲିବ ।